)
सुनील उंबरे, प्रतिनिधी पंढरपूर, 02 नोव्हेंबर : महाराष्ट्र बँकेच्या गाडीवर पडलेल्या दरोड्याचा तपास लावण्यात २४ तासात लावण्यात पंढरपूर पोलिसांना यश आले असून दरोड्याचा बनावं करणारा बँकेचा व्यवस्थापक अमोल भोसले याला बेड्या ठोकल्या आहेत. दरम्यान या दरोड्यात मंगळवेढा तालुक्यातील राष्ट्रवादीचा माजी युवक अध्यक्ष रामेश्वर मासाळ याचा देखील सहभाग असल्याचं आढळून आलं असून पोलिसांनी त्याला देखील अटक केलीय. बुधवारी दुपारी पंढरपूर तालुक्यातील खर्डी गावाजवळ बँक ऑफ महाराष्ट्राच्या गाडीतून ७० लाख रुपयांची रोख रक्कम दरोडेखोरांनी लुटल्याची खबर सांगोला बँकेचे व्यवस्थापक अमोल भोसले यांनी पंढरपूर पोलीस ठाण्यात दिली होती. पोलिसांनी भरदिवसा पडलेल्या या दरोड्याची गांभीर्याने दखल घेत तातडीने शोध पथकं रवाना केली. पण अधिक तपासाअंती संशयाची सुई ही फिर्यादी आणि बँकेचे व्यवस्थापक भोसले यांचेकडे जात असल्याने आढळून आले. पोलिसांनी या अमोल भोसले नावाच्या बँक मॅनेजरला आपला खाक्या दाखवताच भोसलेंनी आपणच दरोड्याचा बनाव रचल्याचं कबुल केलं. भोसलेंनी दिलेल्या माहितीनुसार पोलिसांनी मंगळवेढा तालुक्यातून भाऊसाहेब कोळेकर याला ताब्यात घेतले. त्याच्याकडे चौकशी करता त्याने दरोड्यातील ३१ लाखाची रोकड पोलिसांच्या स्वाधीन केली. या बँक दरोड्याच्या बनाव प्रकरणात पोलिसांनी भोसले आणि कोळेकर या दोघांना अटक केली आहे. दरोड्यातील उर्वरित ३९ लाखाची रक्कम आणि बोलेरो गाडी जप्त करण्यासाठी पोलिसांची पथके कार्यरत असल्याची माहिती सहाय्यक पोलीस अधिक्षक निखिल पिंगळे यांनी दिली. या पत्रकार परिषद प्रसंगी पोलीस निरीक्षक विठ्ठल दबडे, कृष्णदेव खराडे, सहाय्यक पोलीस निरिक्षक हर्षल गालिंदे, विक्रम गायकवाड, पोलीस कॉन्स्टेबल शरद कदम, बबन साळुंखे, पंढरीनाथ आर्किले आदी उपस्थित होते.
मराठी बातम्या, ब्रेकिंग न्यूज मराठीत सर्वात आधी News18 लोकमतवर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.
+6
फोटो
