सत्यजित तांबे यांनी जे टाळलं, ते पत्नीने पाळलं! थेट शुभांगी पाटील यांच्यासोबत..

अहमदनगर, 30 जानेवारी : राजकारणात कोणीही कायमचा शत्रू किंवा मित्र नसतो, असं नेहमी म्हटलं जातं. राज्यातील राजकारणत ही बाब नेहमी पाहायला मिळते. काही दिवसांपूर्वी नाशिक पदवीधर मतदारसंघ निवडणुकीत प्रतिस्पर्धी उमेदवार सत्यजित तांबे आणि शुभांगी पाटील समोरासमोर आल्या होत्या. मात्र, त्यांनी एकमेकांना भेटणे टाळल्याचं पाहायला मिळालं. मात्र, आज सत्यजित तांबे यांच्या पत्नी मैथिली तांबे आणि शुभांगी पाटील समोरासमोर आलेल्या पाहायल्या मिळाल्या. संगमनेरच्या मतदान केंद्रावर या दोघी भेटल्यानंतर प्रतिस्पर्धी असतानाही त्यांनी संस्कृती जपल्याचं पाहायला मिळालं.

संगमनेरच्या मतदान केंद्रावर चर्चा

सत्यजित तांबे यांच्या पत्नी मैथिली तांबे आणि आघाडीच्या उमेदवार शुभांगी पाटील यांची संगमनेर शहरातील शारदा विद्यालय मतदान केंद्रावर भेट झाली. यावेळी कुठलाही अभिनिवेश न बाळगता दोघींनी एकमेकींशी संवाद साधला. या भेटीने महाराष्ट्रातील राजकीय संस्कृतीचे दर्शन पाहायला मिळालं. मैथिली तांबे यांनी आपुलकीने शुभांगी पाटील यांची विचारपूस केली. मोठा मतदार संघ असल्याने थकवा आला असेल असेही विचारलं.

शुभांगी पाटील आणि सत्यजित तांबे यांच्या पत्नी मैथिली संगमनेरमध्ये समोरासमोर..#nashik #Sangamner pic.twitter.com/jSRzamRuTP

— News18Lokmat (@News18lokmat) January 30, 2023

वाचा - थेट मतदान केंद्रावरच शुभांगी पाटील यांच्याकडून प्रचार? हात जोडून.. Video व्हायरल

त्यावेळी फक्त नजरानजर..

काही दिवसांपूर्वी नेवासा तालुक्यातील सोनई येथे गडाख आणि घुले यांचा विवाह सोहळा पार पडला. यावेळी सर्व पक्षीय नेत्यांनी हजेरी लावली. यावेळी नाशिक पदवीधरचे अपक्ष उमेदवार सत्यजित तांबे हे सुद्धा लग्न सोहळ्याला उपस्थित होते. ते बाहेर पडताना त्यांच्या विरोधी उमेदवार शुभांगी पाटील तेथे आल्या. मात्र, दोघेही एकमेकांकडे न पाहता पुढे निघून गेले. मात्र, आजच्या भेटीने राजकीय संस्कृतीचं दर्शन पाहायला मिळाल्याची चर्चा सगळीकडे होते आहे.

ही निवडणूक एकतर्फी झाली : सत्यजित तांबे

“ही निवडणूक एकतर्फी कशी ते तुम्हाला निकालातून दिसेल. विजय अगोदरच झालेला आहे, आता फक्त उत्सुकता एवढीच आहे की मताधिक्य किती होतं. मतदान किती जास्तीत जास्त होतं, त्यासाठी आमचा प्रयत्न सुरू आहे. ” असं सत्यजित तांबेंनी म्हटलं आहे. याचबरोबर, प्रसारमाध्यमांना प्रतिक्रिया देताना सत्यजित तांबेंनी सुरुवातीला सांगितले की, “ज्या पद्धतीने या मतदारसंघात मागील 14 वर्षे माझ्या वडिलांनी प्रतिनिधत्व केलं. एकंदरीतच या पाचही जिल्ह्यांमध्ये ज्या पद्धतीचा ऋणानुबंध त्यांनी इथल्या सामान्य जनतेशी, मतदारांशी निर्माण केला. त्यामुळे ही निवडणूक एकतर्फी झाली.”