पुण्यातील कोयता गँगनंतर मालेगावात तलवार गँगचा धुमाकूळ; घटना सीसीटीव्हीत कैद

मालेगाव, 9 फेब्रुवारी : पुण्यासह इतर काही शहरात कोयता गँगने धुमाकूळ घातलेला असताना मालेगावात तलवार गँगने डोके वर काढलं आहे. सात ते आठ तरुणांच्या टोळक्याने हातात तलवारी घेऊन दहशत माजविण्याचा प्रयत्न केल्यामुळे खळबळ उडाली आहे. ही सर्व घटना सीसीटीव्ह कॅमेऱ्यात कैद झाली आहे. अगोदरच कोयता गँगची दहशत असताना आता तलवार गँगचाही बिमोड करण्याचे पोलिसांसमोर मोठं आव्हान असणार आहे.

टोळक्याचा धुडगूस

सहा ते सात जणांची ही टोळी बाईकवरुन या परिसरात आली होती. तोंडाला रुमाल बांधलेला, हातात तलवारी घेऊन शहरातील आझाद नगर भागातील काबुल चौकात या टोळक्याने धुडगूस घालून दहशत माजविण्याचा प्रयत्न केला. त्यामुळे त्या भागात भीतीचे वातावरण निर्माण झाले आहे. काही वेळ थांबल्यानंतर पुन्हा गाडीवरु बसून हे टोळकं निघून गेलं. दहशत माजविणारी ही टोळी सीसीटीव्ही कॅमेऱ्यात कैद झाली आहे. पोलिसांनी गुन्हा दाखल करून या टोळक्याचा शोध घेत आहे.

Video : राज्यात कोयता गँगनंतर मालेगावात तलवार गँगचा हैदोस#malegaon #nashik #crime pic.twitter.com/PxlV5qV4F0

— News18Lokmat (@News18lokmat) February 9, 2023

कोयता गँगची दहशत थांबेना..

नुकतेच पुण्यातील नुतन मराठी विद्यालयात प्रेम प्रकरणावरून दोन अल्पवयीन मुलांमध्ये झालेल्या वादातून एका विद्यार्थ्यावर भरदिवसा कोयत्याने हल्ला करण्यात आला. विद्यार्थ्याच्या हातावर कोयत्याने वार करण्यात आले असून तो त्यात गंभीर जखमी झाला. धक्कादायक म्हणजे अल्पवयीन तरुणाने या शाळकरी मुलावर हल्ला केला आहे. जखमी झालेल्या विद्यार्थ्याला हॉस्पिटलमध्ये उपचारासाठी दाखल करण्यात आलं आहे. ज्याच्यावर हल्ला झाला आहे, तो पद्मवती या भागात राहायला असून तो 12वीमध्ये शिक्षण घेत आहे. ज्याने हल्ला केला तो तुळशीबागेत काम करतो. हल्ला झालेला मुलगा आरोपी मुलाच्या मैत्रिणीशी बोलत बस स्टॉपला बसला होता. याचा राग त्याला आणि त्याने संबंधित विद्यार्थ्यावर कोयता उगारला आणि या हल्ल्यात त्याच्या शेजारी असलेल्या विद्यार्थ्याला देखील हा कोयता लागला. या हल्ल्यात तो देखील जखमी झाला आहे. या प्रकरणी आरोपी विद्यार्थ्याला पोलिसांनी अटक केली आहे.

पुण्यात मागील काही दिवसांपासून कोयता गँगची दहशत सुरू आहे. याविरोधात पोलिसांनी कारवाईचा बडगा उगारला आहे. काही दिवसांपासून शहरातील हॉटेल, लॉज, एसटी बसस्थानक, रेल्वे स्थानर परिसरात पोलिसांनी शोधमोहीम राबवली होती. सिंहगड रोड पोलिसांनी धायरी परिसरात राहणाऱ्या नीलेश शिवाजी गायकवाड (वय 35) याला अटक करुन त्याच्याकडून देशी बनावटीचे पिस्तूल आणि एक काडतूस जप्त केले होते. अवैध शस्त्र बाळगल्याप्रकरणी 43 जणांना अटक करण्यात आली होती. त्यांच्याकडून 145 कोयते, तलवारी अशी हत्यारे जप्त करण्यात आले होते. तर कोयता बनवणाऱ्या ठिकाणांवरुनही मोठ्या प्रमाणात हत्यारे जप्त करण्यात आली आहे.