)
मुंबई, 10 नोव्हेंबर : लंडनमध्ये असलेली छत्रपती शिवाजी महाराजांची जगदंबा तलवार परत आणण्यासाठी महाराष्ट्र सरकारकडून हालचाली सुरू झाल्या आहेत. यासाठी ब्रिटनचे पंतप्रधान ऋषी सुनक यांच्याशी संपर्क साधणार असल्याची माहिती सुधीर मुनगंटीवार यांनी न्यूज18 लोकमतला दिली आहे. भारतीय वंशाचे ऋषी सुनक काही दिवसांपूर्वीच ब्रिटनचे पंतप्रधान झाले आहेत, त्यामुळे जगदंबा तलवार पुन्हा भारतात आणण्यात यावी, अशी मागणी करण्यात येत आहे. शिवाजी महाराजांच्या पराक्रमाने पावन झालेली जगदंबा तलवार ही देशाची अस्मिता आहे. ही तलवार कोल्हापूरचे चौथे शिवाजी महाराज यांनी 1875 मध्ये तत्कालिन ब्रिटिश युवराज प्रिन्स ऑफ वेल्स यांना भेट दिली होती. सध्या ही तलवार ब्रिटनच्या राणीच्या संग्रहालयात आहे.
‘शिवाजी महाराज विजया दशमीच्या शस्त्रपुजेच्या दिवशी रत्नजडीत जगदंबा तलवारीची पूजा करायचे. ही तलवार इंग्रज घेऊन गेले आहेत. ऋषी सुनक पंतप्रधान झाले आहेत, ज्यांचा भारताशी संबंध आहे. मी केंद्र सरकारला विनंती केली आहे, तसंच मी सुनक यांच्याशीही संपर्क करणार आहे. आमच्या अस्मितेचं शूरतेचं प्रतिक ही जगदंबा तलवार आहे. छत्रपती शिवाजी महाराजांच्या स्पर्शाने ही तलवार पावन झाली आहे. ही तलवार महाराष्ट्राला परत करावी, असं पत्र आम्ही केंद्राला पाठवलं आहे, तसंच ब्रिटनच्या पंतप्रधानांनाही विनंती करत आहोत,’ असं सुधीर मुनगंटीवार म्हणाले.
+6
फोटो
