Ganpatrao Deshmukh: दिवंगत ज्येष्ठ नेते गणपतराव देशमुख यांचा अखेरच्या भाषणाचा VIDEO होतोय व्हायरल

सोलापूर, 31 जुलै : राज्यातील ज्येष्ठ नेते आणि माजी मंत्री भाई गणपतराव देशमुख (Ganpatrao Deshmukh) यांचे काल (30 जुलै 2021) रात्रीच्या सुमारास निधन झाले. सोलापुरातील अश्विनी रुग्णालयात उपचारादरम्यान त्यांची प्राणज्योत मालवली. महाराष्ट्राच्या राजकारणातलं अजातशत्रू व्यक्तिमत्व म्हणून गणपतराव देशमुख कायमच सर्वांच्या स्मरणात राहतील. एकच पक्ष आणि 11 वेळा एकाच मतदारसंघातून गणपतराव देशमुख विजयी होऊन नवा विक्रम प्रस्तापित केला. असे उदाहरण महाराष्ट्राच्या राजकारणात दुर्मिळच आहे. गणपतराव देशमुख यांच्या निधानानंतर त्यांच्या अखेरच्या भाषणाचा एक व्हिडीओ जोरदार व्हायरल (Ganpatrao Deshmukh speech video viral) होत आहे. गणपतराव देशमुख यांचा व्हायरल होणारा हा व्हिडीओ 2019च्या विधानसभा निवडणुकीत केलेल्या भाषणाचा आहे. या व्हिडीओत गणपतराव देशमुख भाषण करताना म्हणत आहेत, "गैरसमज करुन घेतलेला आहे निवडणुकीला उभा राहत नाही म्हणून राजकारण सोडलं असं समजू नका, शेवटच्या श्वासापर्यंत मी जनतेची सेवा करतच राहणार".

ज्येष्ठ नेते गणपतराव देशमुख यांच्या अखेरच्या भाषणाचा VIDEO#GanpatraoDeshmukh pic.twitter.com/LLjWfEza7Q

— News18Lokmat (@News18lokmat) July 31, 2021

2019 च्या विधानसभा निवडणुकी दरम्यान गणपतराव देशमुख ९३ वर्षांचे असताना सुद्धा पुन्हा त्यांनीच उभे रहावे, यासाठी तेथील जनता आग्रही होती. यातून अगदी नव्वदीतही त्यांची लोकप्रियता, जनसंपर्क आणि लोकांचा विश्वास कायम होता, हे दिसून येते. मात्र, वय तसेच शरिर साथ देत नसल्याने त्यांनी निवडणूक न लढण्याचा निर्णय घेतला. एक व्यक्ती, एकच पक्ष आणि एकच मतदारसंघातून 11 वेळा आमदार महाराष्ट्राच्या राजकारणातील एक दिपस्तंभ म्हणून ज्यांची ओळख असली पाहिजे ते म्हणजे परंपरागत दुष्काळी सांगोला (Sangola) तालुक्यातील ज्येष्ठ नेते गणपतराव देशमुख गणपतराव देशमुख हे राजकारणात येण्यापूर्वी वकिली करत होते. या माध्यमातून लोकांना न्याय देता देता त्यांची शेतकरी कामगार पक्षाशी काम करण्याची जवळीक झाली. 1950 पासून ते शेकापचे सक्रिय कार्यकर्ते झाले. 1962 साली गणपतराव देशमुख यांनी सांगोला विधानसभा मतदारसंघातून निवडणूक लढवली. इथूनच त्यांची राजकीय कारकीर्द बहरू लागली. पहिली निवडणूक लढवताना दुष्काळी सांगोल्यातील जनतेला पाणी मिळाले पाहिजे, या मागणीसाठी त्यांनी लढाई सुरू केली होती. आणीबाणीच्या काळात त्यांनी तुरुंगवासही भोगला होता. 1972 च्या विधानसभा निवडणुकीत त्यांना पराभव पत्करावा लागला होता. पण दोन वर्षांतच झालेल्या पोटनिवडणुकीत गणपतराव पुन्हा निवडून आले ते सलग 1995 पर्यंत. याकाळात 1977 साली त्यांनी महाराष्ट्र विधानसभेचे विरोधी पक्षनेते पद सांभळले होते. पुलोद काळात 1978 साली ते पहिल्यांदा राज्यमंत्री मंडळात सहभागी झाले. त्यानंतर 1999 साली पुन्हा मंत्री झाले. याकाळात त्यांनी दुष्काळी भागाचा पाणी प्रश्न सोडवण्यासाठी कायम लढा दिला. त्यांच्या प्रयत्नांमुळेच दुष्काळी सांगोल्यात टेंभू आणि म्हैसाळ योजनेचे पाणी पोहचले. 1995 च्या पराभवानंतर गणपतराव देशमुख यांनी 1999 पुन्हा निवडून आले. 2014 पर्यंत त्यांनी 11 वेळा विधानसभेमध्ये प्रतिनिधित्व केले. 2019 साली सुद्धा त्यांना निवडणूक लावण्याचा आग्रह समर्थ समर्थकांनी केला. पण 93 वर्ष असलेले वय तसेच शरीर साथ देत नसल्याने त्यांनी निवडणूक न लढवण्यावर ठाम राहत आपला निर्णय बदलला नाही. एकच शेतकरी कामगार पक्ष, एकच मतदारसंघ सांगोला विधानसभा मतदारसंघ आणि एकच उमेदवार गणपतराव देशमुख महाराष्ट्रात असं उदाहरण दुर्मिळच आहे. आजोबांपासून नातवाचेही मतदान गणपतराव यांना मिळाले होते. आयुष्यातील 50 वर्ष त्यांनी विधानसभेतील अनेक मुख्यमंत्री आणि मंत्री यांचे काम पाहिली होती. तसंच आपल्या कामाचा ठसा सुद्धा त्यांनी राज्यातील राजकारणात उमटवला होता. आज त्यांच्या जाण्यामुळे विधानसभेचा एक साक्षीदार निखळला अशी भावना व्यक्त होत आहे.