Corona Virus In Maharashtra: महाराष्ट्रात तिसरी लाट निश्चित?, Covid टास्क फोर्स सक्रिय; अशी सुरुय तयारी

मुंबई, 29 डिसेंबर: महाराष्ट्रात (Maharashtra Coronavirus Case)कोरोना व्हायरसचा संसर्ग दिवसेंदिवस वाढता चालला आहे. कोरोना व्हायरस आणि ओमायक्रॉन व्हेरिएंटची (Omicron Variant) लागण झालेल्या रुग्णांचा आकडा वाढतोय. वाढत्या रुग्णांचा आकडा पाहता आरोग्य विभागाचे अधिकारी सतर्क झाले आहेत. जानेवारीच्या मध्यापर्यंत आरोग्य विभागाकडून ओमायक्रॉन संसर्गाच्या प्रकरणांमध्ये वाढ होण्याची शक्यता आहे. त्यामुळे या पार्श्वभूमीवर कोविड टास्क फोर्स (Covid Task Force)सक्रिय झाला आहे. टास्क फोर्सनी जम्बो हॉस्पिटलमध्ये तयारीसाठी मॉक ड्रिल सुरू केल्या आहेत.

लहान मुलांमध्ये कोरोनाचे रुग्ण वाढण्याची शक्यता असताना यावेळी तयार करण्यात आलेल्या पीडियाट्रिक वॉर्डमध्ये अत्याधुनिक साधनसामग्री बसवली जात आहे. तसंच त्यांची चाचणी देखील सुरू आहे.

आरोग्य विभागाच्या अधिकाऱ्यांनी सांगितलं की, कोविड टास्क फोर्स सिरीज पंप, मल्टी-पॅरा मॉनिटर्स, व्हेंटिलेटर यांच्यासह पाइपलाइन चाचणी तसंच पॅथॉलॉजीच्या चाचणीसाठी ड्रिल करत आहे. कोविड टास्क फोर्सचे पथक सध्या ड्रिल करत आहेत जी स्पष्टपणे संभाव्य तिसऱ्या लाटेची तयारी आहे. जेणेकरून परिस्थिती आणखी बिघडली आणि मुले कोरोनाच्या विळख्यात आल्यास त्यांच्यावर तातडीने उपचार करता येतील.

टास्क फोर्सनं संपूर्ण वॉर्डातील मुलांसाठी खेळणीही तयार केली आहेत. त्याचबरोबर कुटुंबातील सदस्यांपासून दूर राहिल्याने मुलांना त्रास होऊ नये म्हणून प्रभागात स्वतंत्र पालकत्वासाठीही विशेष व्यवस्था करण्यात आली आहे.

महाराष्ट्रात कोरोना बाधितांची संख्या वाढली

महाराष्ट्रात कोरोना व्हायरसच्या ओमायक्रॉन व्हेरिएंटच्या 26 नवीन रुग्णांची पुष्टी झाली आहे. यानंतर राज्यातील एकूण ओमायक्रॉन रुग्णांची संख्या 167 वर पोहोचली आहे. देशाची आर्थिक राजधानी मुंबईत सोमवारी कोविड-19 चे 809 नवीन रुग्ण आढळल्याने बाधितांची संख्या 7,71,921 वर पोहोचली असून आणखी तीन रुग्णांचा मृत्यू झाल्याने मृतांचा आकडा 16,373 वर पोहोचला आहे.

#COVID19 | Maharashtra reports 2,172 new cases, 1,098 recoveries, and 22 deaths today. Active cases 11,492 No new #Omicron case was reported in the state; till date, a total of 167 Omicron cases have been reported in Maharashtra pic.twitter.com/p5Alq0inxD

— ANI (@ANI) December 28, 2021

महाराष्ट्रात एकूण 2172 केसेस नोंदवण्यात आल्या आहेत. यापैकी 1680 केसेस मुंबई महानगर क्षेत्रातील आहेत. गेल्या काही दिवसांपासून महाराष्ट्रातील एकूण रुग्णांच्या तुलनेत मुंबईत सापडणाऱ्या रुग्णांची आकडेवारी वाढत असल्याचं दिसून येत आहे. गेल्या तीन ते चार दिवसांतील आकडेवारीवरून महाराष्ट्रात सापडलेल्या एकूण रुग्णांपैकी मुंबईतील प्रमाण सतत 55 टक्क्यांच्या वर नोंदवलं गेलं आहे. तर ताज्या आकडेवारीनुसार ते 77 टक्क्यांवर पोहोचलं आहे. मुंबईसाठी ही चिंताजनक बाब असून नागरिकांची काळजी यामुळे वाढली आहे.

मुंबई महापालिकेनं दिलेल्या माहितीनुसार गेल्या 338 रुग्णांना उपचारानंतर घरी सोडण्यात आलं आहे. तर संपूर्ण महाराष्ट्राचा विचार करता 1098 जण कोरोनातून बरे झाले आहेत, तर 22 जणांचा कोरोनामुळे मृत्यू झाल्याची नोंद करण्यात आली आहे.