कोमात गेलेल्या Aindrila Sharma ची मृत्यूशी झुंज अपयशी, 24 व्या वर्षी घेतला अखेरचा श्वास

मुंबई, 20 नोव्हेंबर : प्रसिद्ध अभिनेत्री तबस्सुम गोविल यांच्या निधनानंतर मनोरंजन विश्वातून आणखी एक दुःखद बातमी समोर आली आहे. बंगालची लोकप्रिय अभिनेत्री एंड्रिला शर्माचं निधन झालं आहे. अभिनेत्रीचे रविवार 20 नोव्हेंबर रोजी कोलकाता येथील रुग्णालयात निधन झाले. ही बातमी समोर येताच अभिनेत्रीच्या चाहत्यांवर दुःखाचा डोंगर कोसळला आहे. मनोरंजन विश्वातही शोककळा पसरली आहे. एंड्रिला शर्माने वयाच्या 24 व्या वर्षी अखेरचा श्वास घेतला.

गेल्या बऱ्याच दिवसांपासून बंगालची लोकप्रिय अभिनेत्री एंड्रिला शर्माची प्रकृती चिंताजनक होती. अभिनेत्रीला 15 नोव्हेंबर रोजी अचानक हृदयविकाराचा झटका आला, त्यानंतरच तिच्या मेंदूमध्ये रक्ताच्या गुठळ्या जमा झाल्या. डॉक्टरांनी अभिनेत्रीला व्हेंटिलेटरवर ठेवले होते.  एंड्रिला कोमात होती. मुलीला वाचवण्यासाठी कुटुंबाने आत्तापर्यंत पाण्यासारखा पैसा खर्च केला. अभिनेत्रीच्या निधनाने सगळ्यांनाच मोठा धक्का बसला आहे.

हेही वाचा -  कोमात गेलेल्या अभिनेत्रीसाठी पुढे आला Arijit Singh, निर्णय ऐकून तुम्हालाही वाटेल कौतुक

अभिनेत्री एंड्रिला शर्मा रुग्णालयात असून कोमात होती. 1 नोव्हेंबर रोजी तिला ब्रेन स्ट्रोक आला. तिची प्रकृती अत्यंत वाईट होती . त्याचबरोबर तिला अनेकदा हृदयविकाराचा झटकाही आला होता. प्रकृतीच्या कारणास्तव एंड्रिलाला याआधीही अनेकदा रुग्णालयात दाखल करण्यात आले होते. अभिनेत्री प्रदीर्घ काळापासून तिच्या प्रकृतीशी झुंज देत होती. मात्र आता हे प्रकरण गंभीर बनत चालले होते. अभिनेत्रीचे चाहते ती लवकर बरी होण्यासाठी प्रार्थना करत होते. अखेर अभिनेत्रीची जीवनाची लढाई अयशस्वी ठरली.

अभिनेत्री परिस्थिती पाहून बॉलिवूड गायक अरिजित सिंग याने एंड्रिलाच्या कुटुंबाच्या मदतीसाठी हात पुढे केला होता. अरिजित सिंह अभिनेत्रीच्या कुटुंबाच्या संपर्कात होता.अरिजित सिंह हा एंड्रिलाप्रमाणेच मुर्शिदाबादचा आहे. जेव्हा त्याला कळते की ती हॉस्पिटलमध्ये जीवन मृत्यूशी खूप संघर्ष करत आहे, तेव्हा त्याने एंड्रिलाला मदत करण्याचा निर्णय घेतला.

दरम्यान, एंड्रिला शर्मा बंगाल इंडस्ट्रीतील एक मोठे नाव आहे. एंड्रिला शर्माने 'झुमुर' या टीव्ही शोमधून अभिनय क्षेत्रात पदार्पण केले होते. तिनं तिच्या अभिनयाने अनेक प्रेक्षकांची मने जिंकली आहेत.  यानंतर तिने अनेक लोकप्रिय शोमध्ये काम केले. 'जीवन ज्योती', 'जिओं काठी'मध्ये ती मुख्य अभिनेत्रीच्या भूमिकेत दिसली आहे.