)
अंबरनाथ, 19 मार्च : धुळवडीला (Holi 2022) मित्र रंग लावतील या भीतीने एक तरुण इमारतीच्या गच्चीमध्ये जाऊन लपला. मात्र याच इमारतीच्या गच्चीवरुन खाली पडल्यानं त्याचा दुर्दैवी मृत्यू झाल्याची घटना घडली आहे. अंबरनाथ पूर्वेच्या शिवाजी नगर भागात ही घटना घडली आहे. सूरज मोरे असे मृत झालेल्या तरुणाचे नाव आहे. शिवाजीनगर परिसरात घडलेल्या या घटनेत सुरजचा दुर्दैवी मृत्यू झाल्याने तो राहत असलेल्या परिसरात आणि त्याच्या मित्र परिवारामध्ये शोककळा पसरली आहे. शिवाजीनगर भागात सुरज हा 26 वर्षीय तरुण आपल्या कुटुंबीयासोबत राहतो. शुक्रवारी धुळवडीच्या दिवशी सुरज हा त्याचा भाऊ तुषार मोरे याच्यासह दुपारी अविनाश पाटील या मित्राला भेटण्यासाठी गेले होते. शिवाजीनगर पोलीस ठाण्यासमोर नव्याने झालेल्या इमारतीत अविनाश वास्तव्याला असून याच इमारतीखाली हे तिघे बोलत उभे होते. यावेळी त्यांच्याच परिसरातले इतर काही मित्र तिथून जात असताना त्यांना सूरज आणि तुषार दिसल्याने ते त्यांना रंग लावण्यासाठी आले. यावेळी सूरज आणि तुषार हे दोघेही इमारतीत पळाले. तुषार हा पहिल्या मजल्यावर लपला, तर सूरज हा थेट गच्चीत जाऊन लपला. यावेळी तुषार याला मित्रांनी पकडून खाली आणलं, त्याला रंग लावत असतानाच अचानक सूरज हा गच्चीतून खाली पडला. इमारतीच्या टेरेसवर असलेल्या डक्टमधून सूरज खाली पडला आणि त्याच्या पायाला दुखापत झाली. हे ही वाचा- धुळवडीच्या रंगापासून वाचण्याच्या नादात आयुष्याचा उडाला रंग; तरुणाचा दुर्दैवी अंत यानंतर त्याच्या भावाने आणि मित्रांनी तातडीने आधी अंबरनाथच्या एका खासगी रुग्णालयात, तिथून उल्हासनगरच्या मध्यवर्ती रुग्णालयात आणि तिथून उल्हासनगरच्या खासगी रुग्णालयात सूरजला नेलं. मात्र डॉक्टरांनी त्याला मृत घोषित केलं. या घटनेमुळे मोरे कुटुंबीयांवर दुःखाचा डोंगर कोसळला आहे. याप्रकरणी शिवाजीनगर पोलिसांनी अकस्मात मृत्यूची नोंद केली आहे. अंबरनाथ बदलापूर शहरात होळी सणाच्या दिवशी एक आत्महत्या त्याचबरोबर दोन वेगवेगळ्या घटनेत दोघांचा मृत्यू झाल्याने होळी सणाच्या दिवशी दोन्ही शहरांमध्ये या दुःखद बातम्यांमुळे शोककळा पसरली होती.
मराठी बातम्या, ब्रेकिंग न्यूज मराठीत सर्वात आधी News18 लोकमतवर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.
+6
फोटो
