Jio पूर्वी Airtel 5G सेवा लाँच करणार? महाराष्ट्रातील या शहरांमध्ये सर्वप्रथम मिळणार सुविधा
मुंबई, 22 ऑगस्ट: भारतामध्ये 5G इंटरनेट सेवेबाबत कमालीची उत्सुकता लागून राहिली आहे. पंरतु आता भारतीयांना 5G सेवा सुरु होण्यासाठी फार वाट पाहावी लागणार नाही. लवकरच देशात 5G सेवेला सुरुवात होणार आहे. त्यानंतर तुम्ही तुमच्या 5G स्मार्टफोनवर 5G सेवेचा आनंद घेऊ शकता. दूरसंचार ऑपरेटर कंपनी एअरटेलची 5G सेवाही (Airtel 5G Service) याच महिन्यात सुरू होणार आहे. कंपनीनं काही काळापूर्वी याबाबत माहिती दिली होती. ऑगस्टमध्ये 5G सेवा सुरू होईल, असे कंपनीनं सांगितलं होतं. एअरटेल 5G सेवा सुरू झाल्यास या महिन्यापासून तुम्ही एअरटेलच्या 5G सेवेचा आनंद घेऊ शकता. एअरटेलने 5G स्पेक्ट्रमसाठी सुमारे 43,000 कोटी रुपये खर्च केले आहेत. एअरटेलने 5G सेवा सुरू होण्याच्या तारखेबद्दल अद्याप अधिकृत माहिती दिलेली नाही. परंतु, कंपनीचे सीईओ गोपाल विट्टल यांनी यापूर्वी सांगितले होते की, ऑगस्ट महिन्यातच 5G सेवा सुरू केली जाईल. कोणत्या शहरांना मिळणार 5G सेवा? Airtel ची 5G सेवा या महिन्यात लॉन्च झाली तरी ती सेवा सुरुवातीच्या टप्प्यात फक्त काही मेट्रो शहरांमध्येच दिली जाईल. ज्या शहरांमध्ये 5G सेवेची पायलट चाचणी यशस्वी झाली आहे तिथेच ही सेवा मिळणार आहे. नंतर टप्प्याटप्प्यात ही सेवा देशातील विविध शहरांमध्ये सुरु होईल. एअरटेलची 5G सेवा या वर्षाच्या अखेरीस टियर-2 आणि टियर-3 शहरांमध्ये उपलब्ध होईल. तर भारतभर एअरटेलच्या 5G सेवेसाठी मार्च 2024 पर्यंत प्रतीक्षा करावी लागू शकते. भारतात एअरटेलचे 5G बँड- Airtel ने 900 MHz (n8), 1800 MHz (n3), 2100MHz (n1), 3300 MHz (n78), आणि 26 GHz (n258 mmWave) बँड विकत घेतले आहेत. यासाठी कंपनीने सुमारे 43,038 कोटी रुपये खर्च केले. हेही वाचा- Best Parenting Apps: मुलांच्या संगोपनाची चिंता सतावतीये? ही 5 पॅरेंटिंग अ‍ॅप्स ठरतील उपयुक्त भारतातील या शहरात सर्वप्रथम सुरु होणार Airtel 5G सेवा- एका अहवालानुसार, एअरटेल 5G सेवा प्रथम दिल्ली, गांधीनगर, बेंगळुरू, चंदीगड, गुरुग्राम, हैदराबाद, जामनगर, अहमदाबाद, चेन्नई, कोलकाता, लखनौ, मुंबई आणि पुणे येथे सुरू केली जाईल. म्हणजेच पहिल्या 13 शहरांमध्ये हे लॉन्च केले जाईल. नंतर ते टियर-2 आणि टियर-3 शहरांमध्ये रिलीज होईल. एअरटेल 5g किंमत- Airtel 5G च्या किंमतीबाबत कोणतीही अधिकृत माहिती समोर आलेली नाही. पण त्याची किंमत 4G पेक्षा नक्कीच जास्त असू शकते. 5G प्लॅनची किंमत भारतात 500 रुपयांपासून सुरू होऊ शकते, असा अंदाज वर्तवला जात आहे. सध्या Airtel 4G प्लॅनची किंमत सुमारे 300 रुपयांच्या आसपास आहे.