केएल राहुल संकटमोचक ठरला, पण जडेजाला कसा मिळाला प्लेअर ऑफ द मॅच?
मुंबई, 18 मार्च : भारत विरुद्ध ऑस्ट्रेलिया यांच्यात शुक्रवारी मुंबईतील वानखेडे स्टेडियमवर वनडे मालिकेतील पहिला सामना खेळवला गेला. या सामन्यात भारताचा स्टार फलंदाज के एल राहुल आणि रवींद्र जडेजा यांच्या अर्धशतकीय भागीदारीमुळे भारताने सामना ५ विकेट्सने जिंकला. या सामन्यात के एल याने फलंदाजीत भारताकडून सर्वाधिक 75 धावा केल्या परंतु तरीही रवींद्र जडेजा याला प्लेअर ऑफ द मॅचचा पुरस्कार देण्यात आला. यावरून सध्या के एल राहुलच्या चाहत्यांमध्ये संभ्रम निर्माण झाला आहे. भारताने काल ऑस्ट्रेलिया विरुद्धचा वनडे मालिकेतील पहिला सामना जिंकून मालिकेत 1-0 अशी आघाडी घेतली आहे. या सामन्यात ऑस्ट्रेलियाने दिलेलं 189 चं आव्हान भारताने 39.5 ओव्हरमध्ये 5 विकेट राखून पूर्ण केलं. भारताच्या हातून सामना निसटतोय असं वाटत असताना के एल राहुल आणि रवींद्र जडेजा या दोघांनी भागीदारी करून भारताला विजयाच्या दिशेने पोहोचवलं. के एल राहुल हा या सामन्यात भारताचा संकटमोचक ठरला. या सामन्यात त्याने 91 चेंडूत 75 धावा केल्या. तर रवींद्र जडेजाने 69 चेंडूत 45 धावा केल्या. IND vs AUS 1st ODI : ‘नाटू नाटू’ गाण्याने किंग कोहलीलाही लावलं वेड! भर मैदानात केली धम्माल स्टेप
नाणेफेक जिंकून गोलंदाजीसाठी मैदानात उतरलेल्या टीम इंडियाने ऑस्ट्रेलिया संघाला 188 धावांवर सर्वबाद केले. यात मोहम्मद शमी आणि सिराज या दोघांनी प्रत्येकी 3 विकेट घेतल्या, रवींद्र जडेजाला 2 विकेट तर हार्दिक पांड्या आणि कुलदीप यादव या दोघांना प्रत्येकी 1 विकेट घेण्यात यश आले. रवींद्र जडेजाने संघासाठी 45 धावांसह 2 विकेट घेतल्याने त्याला प्लेअर ऑफ द मॅच पुरस्काराने सन्मानित करण्यात आले.