लखनऊ, 7 मार्च : उत्तर प्रदेश विधानसभा निवडणुकीचं (UP Election 2022) बिगूल वाजलं तेव्हा शिवसेनेचे नेते संजय राऊत (Sanjay Raut) यांनी युपीत (UP) 60 जागांवर उमेदवार उभे करु आणि त्या 60 जागांवर शंभर टक्के जिंकूनच येऊ, असा निर्धार केला होता. विशेष म्हणजे शिवसेनेचे नेते, महाराष्ट्राचे पर्यावरण मंत्री आदित्य ठाकरे (Aaditya Thackeray) स्वत: युपीत प्रचारासाठी गेले होते. त्यावेळी त्यांनी भाजपच्या योगी आदित्यनाथ (Yogi Adityanath) यांना माजी मुख्यमंत्री होण्याची वेळ आली असल्याचं म्हटलं होतं. तसेच शिवसेना (Shiv Sena) सर्वच जागांवर निवडून येणार असल्याचा उद्गार केला होता. उत्तर प्रदेशच्या सातही टप्प्यातील निवडणूक पार पडली असून आता Exit Poll ची आकडेवारी समोर आली आहे. या आकडेवारीत शिवसेनेला कुठेच स्थान नसल्याचं चित्र आहे. त्यामुळे शिवसेनेची या निवडणुकीतही डिपॉझिट जप्त होते की काय? हे पाहणं महत्त्वाचं ठरणार आहे. उत्तर प्रदेशातील निवडणुकीमध्ये शिवसेनेच्या कार्यपद्धतीवर सांगायचं झाल्यास तर पक्षाकडून ताकद लावण्याचा सर्वोतोपरी प्रयत्न करण्यात आल्याचं दिसलं. पक्षातील दिग्गज नेत्यांच्या रॅली युपीत झाल्या. पण सोशल मीडियावर गाजावाजा करण्यात शिवसेना काहिशी कमी पडल्याचा अंदाज आहे. कारण शिवसेनेच्या युपीच्या अधिकृत ट्विटर वॉलवर शिवसेनेच्या नेमक्या किती उमेदवारांनी निवडणुकीच्या रिंगणात अर्ज दाखल केलाय याबाबतची सविस्तर माहिती देखील शेअर करण्यात आलेली नव्हती. ‘इंडियन एक्सप्रेस’ने दिलेल्या माहितीनुसार उत्तर प्रदेशच्या विधानसभा निवडणुकीत शिवसेनेकडून 60 उमेदवार उभे करण्यात आले होते. पण निवडणूक आयोगाने 19 जणांची उमेदवारी नाकारली होती. त्यामुळे 41 उमेदवार हे निवडणुकीच्या रिंगणात आहेत. पण एक्झिट पोलच्या आकडेवारी यापैकी कुणालाही यश येईल, याची शक्यता खूप कमी असल्याचं स्पष्ट करण्यात आलं आहे. उत्तर प्रदेशातील एक्झिट पोलची आकडेवारी : रिपब्लिक संस्थेचा एक्झिट पोल : भाजपला 262 ते 277 जागांवर यश मिळण्याची शक्यता समाजवादी पक्षाला 119 ते 134 जागांवर यश मिळण्याची शक्यता बहुजन समाज पक्षाला 7 ते 15 जागांवर यश मिळण्याची शक्यता काँग्रेसला 3 ते 8 जागांवर यश मिळण्याची शक्यता इतर - 2 ते 6 ‘न्यूज एक्स’च्या एक्झिट पोलची आकडेवारी : भाजप - 211 ते 225 सपा - 146 ते 160 बसपा - 14 ते 24 काँग्रेस - 4 ते 6 इतर - 0 tv9 भारतवर्षचा एक्झिट पोल : भाजप : 211-225 सपा : 146-160 बसपा - 14-24 काँग्रेस - 4-6 इतर - 0 गोव्यातही शिवसेनेची तीच अवस्था गोवा विधानसभा निवडणुकीत शिवसेना जास्त सक्रिय झाली होती. शिवसेनेचे नेते बरेच दिवस तिथे मुक्काला होते. त्यामुळे शिवसेना भाजपला भारी पडेल का? याबाबतची उत्सुकता अनेकांच्या मनात होती. पण ‘झी न्यूज हिंदी’ने दिलेल्या एक्झिट पोलनुसार शिवसेनेला किती जागा मिळणार याबाबत काहीच उल्लेख नसल्याचं चित्र आहे. ‘झी न्यूज हिंदी’च्या एक्झिट पोलच्या आकडेवारीनुसार भाजपला 13 ते 18 जागा मिळण्याचा अंदाज व्यक्त करण्यात आला आहे. तर काँग्रेसला 14 ते 19 जागा मिळतील अशी शक्यता आहे. तर आम आदमी पक्षाला 1 ते 3 जागांवर समाधान मानावे लागेल. गोव्याची मगोवा पार्टीला 2 ते 5 जागांवर समाधान मानावे लागणार आहे. या निवडणुकीत शिवसेनेने नशिब आजमावले आहे. पण सेनेला कोणतीही जागा मिळणार नाही, अशी चिन्ह आहे. ( Exit Polls चे निकाल येताच समीकरणं जुळवण्यासाठी राजकीय हालचालींना वेग ) देशभरातील उत्तर प्रदेश, गोवा, उत्तराखंड, पंजाब आणि मणिपूर या पाच राज्यांच्या विधानसभा निवडणुका पार पडल्या. उत्तर प्रदेशात आज सातव्या टप्प्यातील निवडणुकीसाठी मतदान पार पडलं. या पाच राज्यांचे निकाल दोन दिवसांनंतर म्हणजेच येत्या गुरुवारी 10 मार्चला समोर येणार आहेत. येत्या गुरुवारी मतमोजणी होणार आहे. पण त्याआधी या पाच राज्यांचे एक्झिट पोल समोर आले आहेत. विशेष म्हणजे कोरोना संकटानंतरची या देशातील सर्वात मोठ्या निवडणुका होत्या. संपूर्ण देशाचं लक्ष या निवडणुकांकडे आहे. विशेषत: उत्तर प्रदेशच्या विधानसभा निवडणुकीकडे देशासह जगभरातील भारतीयांचं लक्ष लागलं आहे. त्याला कारणही अगदी तसंच साजेसं आहे. गेल्या विधानसभा निवडणुकीत भाजपने मित्र पक्षांसोबत तिथे एकहाती सत्ता मिळवली होती. पण गेल्या तीन ते चार वर्षात उत्तर प्रदेशात घडलेल्या अनेक घटना पाहता यावेळी भाजप पुन्हा सत्ता स्थापन करण्यात यशस्वी होते का? की समाजवादी पक्षाची सायकल जलत गतीला धावून भाव खाऊन जाते, याकडे अनेकांचं लक्ष लागलं होतं. हेही पाहा : तुम्ही आमच्या ShareChat च्या अधिकृत पेजवरुनही पाच राज्यांच्या विधानसभा निवडणुकीचे एक्झिट पोल संदर्भातील विविध अपडेट वाचू शक ता या निवडणुकीत भाजप आणि समाजवादी पक्षाला बहुमत मिळालं नाही तर बहुजन समाजवादी पक्ष, एमआयएम यांना जास्त महत्त्व प्राप्त होऊ शकतं, असा अंदाज वर्तवला जात होता. तर दुसरीकडे काँग्रेसच्या सरचिटणीस प्रियंका गांधी यांच्या नेतृत्वात काँग्रेस मुसंडी मारतं की पुन्हा पदरात निराशा पडते? याकडे अनेकांचं लक्ष लागलं होतं. याशिवाय महाराष्ट्रात सत्तेत असलेला शिवसेना पक्षाला उत्तर प्रदेशच्या निवडणुकीत नेमकं कितपत यश येतं हे देखील पाहणं महत्त्वाचं होतं. आता या निवडणुकीच्या एक्झिट पोलची आकडेवारी समोर आली आहे.