नवी दिल्ली, 14 सप्टेंबर : मंगळवारी अमेरिकेतील महागाईची आकडेवारी समोर आल्यानंतर अमेरिकन शेअर बाजार कोसळला आहे. जुलैच्या तुलनेत ऑगस्टमध्ये महागाई 0.1 टक्क्यांनी वाढली आहे. त्यामुळे अमेरिकन शेअर बाजारातील तिन्ही प्रमुख निर्देशांकांमध्ये मोठी घसरण झाली. बाजारातील या भूकंपाचा परिणाम अमेरिकन श्रीमंतांच्या भांडवलावरही झाला आहे. अॅमेझॉनचे संस्थापक जेफ बेझोस यांना एका दिवसात सुमारे 80 हजार कोटी रुपयांचे नुकसान झाले आहे. त्याचप्रमाणे जगातील सर्वात श्रीमंत व्यक्ती इलॉन मस्क यांच्या संपत्तीत 70 हजार कोटींनी घट झाली आहे. मनीकंट्रोलच्या अहवालानुसार, जेफ बेझोस हे जगातील सर्वात मोठी ई-कॉमर्स कंपनी अॅमेझॉनचे संस्थापक आहेत. याशिवाय ते स्पेस एक्सप्लोरेशन कंपनी ब्लू ओरिजिनचेही मालक आहेत. इलॉन मस्क हे इलेक्ट्रिक वाहने आणि घरातील सौर बॅटरी बनवणाऱ्या टेस्ला कंपनीचे सीईओ आहेत. मस्क हे स्‍पेसएक्‍सचे देखील मालक आहेत. ब्लूमबर्ग अब्जाधीश इंडेक्‍सच्या टॉप 25 मध्ये 17 अमेरिकन अब्जाधीश आहेत. अमेरिकन शेअर बाजारातील घसरणीमुळे सर्व अमेरिकन अब्जाधीशांचे मोठे नुकसान झाले आहे. मेटा सीईओ मार्क झुकरबर्ग, गुगलचे संस्थापक सर्गेई ब्रेन आणि मायक्रोसॉफ्टचे माजी सीईओ स्टीव्ह बोमर यांचाही हजारो कोटींचा तोटा झालेल्यांमध्ये समावेश आहे.
यांचेही मोठे नुकसान अमेरिकन बाजारातील घसरणीतून एकही अमेरिकन अब्जाधीश वाचलेला नाही. मेटा सीईओ मार्क झुकेरबर्ग यांना 32 हजार कोटींचे नुकसान झाले आहे. त्याचप्रमाणे गुगलचे संस्थापक सर्गेई ब्रेन यांचेही हेच भांडवल एका दिवसात कमी झाले आहे. लॅरी पेज देखील मंदीपासून वाचले नाहीत आणि त्यांना 400 दशलक्ष कोटींचे नुकसान झाले आहे. वाचा - शेअर बाजारातील तेजीला आज ब्रेक लागणार? काय आहे कारण? मायक्रोसॉफ्टचे माजी सीईओ स्टीव्ह बोमर यांचीही स्थिती त्यांच्यापेक्षा वेगळी नाही. त्यांनाही एका दिवसात 32 हजार कोटींहून अधिक रुपयांचा फटका बसला आहे. वॉरन बफेच्या संपत्तीतही 340 कोटी डॉलर म्हणजेच 26,996 कोटी रुपयांची घट झाली आहे. त्याचवेळी मायक्रोसॉफ्टचे संस्थापक बिल गेट्स यांच्या भांडवलात 22,232 कोटी रुपयांची घट झाली आहे.