Aadhar Card: पेन्शनधारकांना आधार कार्डवरून मिळतात ‘या’ 3 खास सुविधा, बँकेत जाण्याची नाही गरज

मुंबई, 30 ऑगस्ट: आधार कार्ड हा आजच्या काळात आपल्या ओळखीचा सर्वात महत्त्वाचा दस्तऐवज आहे. 12 अंकी आधार शिवाय कोणत्याही सरकारी योजनेचा लाभ घेणं कठीण आहे. आधार क्रमांक कोणत्याही नागरिकाला आयुष्यात एकदाच दिला जातो. आधार UIDAI द्वारे जारी केला जातो. UIDAI वेबसाइटनुसार, आधार कार्ड असलेल्या कोणत्याही नागरिकाला त्याची ओळख सिद्ध करण्यासाठी आणखी काही कागदपत्रे देण्याची गरज नाही. इलेक्ट्रॉनिक्स आणि आयटी मंत्रालयाच्या म्हणण्यानुसार, आधार कार्डच्या मदतीनं पीएफ आणि पेन्शनधारकांच्या खात्यात थेट पैसे पोहोचणं शक्य झालं आहे. लाभार्थ्यांना यापुढे बँकेला भेट देण्याची गरज नाही किंवा त्यांना जीवन प्रमाणपत्राची हार्ड कॉपी सादर करण्याची आवश्यकता नाही. मंत्रालयाच्या म्हणण्यानुसार, पेन्शनधारकांना आधार असल्‍यानं अनेक फायदे (Benefits of Aadhar card for Pensioners) मिळतात. लवकर मिळतील पीएफचे पैसे- तुमच्या कर्मचारी भविष्य निर्वाह निधी (EPF) खात्याशी आधार लिंक करून दावा निकाली काढण्याच्या प्रक्रियेला गती मिळू शकते. ईपीएफओने यासंदर्भात अनेक महत्त्वाची पावले उचलली आहेत. ईपीएफओ पोर्टलनुसार, जर तुम्हाला ऑनलाइन ईपीएफचा दावा करायचा असेल, तर तुम्ही तुमचा यूएएन अनिवार्यपणे आधारशी लिंक करणे आवश्यक आहे. तपशील वेरिफिकेशन करणं होतं सोपं- ईपीएफ खात्याशी आधार लिंक करणं अनिवार्य नाही. पण आधार लिंक केल्यानं अधिकाऱ्यांना तुमच्या सर्व तपशीलांची पडताळणी करणं सोपं होईल. तुमचं आधार पेन्शन खात्याशी ऑनलाइन किंवा ऑफलाइन लिंक केलं जाऊ शकतं. तुमचे सर्व तपशील उपलब्ध असल्यास, तुमचा दावा त्वरीत निकाली काढला जाऊ शकतो आणि वेळेत पैसे तुमच्या खात्यात जमा होतील. हेही वाचा-  शॉर्ट टर्म कॉर्पोरेट FD करण्याचा विचार करताय? फायदे मिळतील पण ‘या’ गोष्टीही लक्षात ठेवा जीवन प्रमाणपत्र- पेन्शनधारकांना दरमहा पेन्शन मिळण्यासाठी दरवर्षी बँकांमध्ये जीवन प्रमाणपत्र सादर करावं लागतं. तथापि, आधार आधारित जीवन प्रमाण सेवेमुळे ऑनलाइन डिजिटल जीवन प्रमाणपत्र (DLC) सादर करणं शक्य झालं आहे. या कारणास्तव पेन्शनधारकांना बँकेत जाऊन जीवन प्रमाणपत्र सादर करण्याची गरज नाही. केंद्र आणि राज्य सरकारच्या पेन्शनधारकांसाठी ही बायोमेट्रिक-सक्षम डिजिटल सेवा आहे. यासाठी पेन्शन खाते आधारशी लिंक करणे आवश्यक आहे. UAN ला आधारशी कसं लिंक करावं- पीएफचा यूएनएन आधारशी लिंक करण्याचा मार्ग अगदी सोपा आहे. यासाठी प्रथम तुम्ही https://unifiedportal-mem.epfindia.gov.in/memberinterface/ वर जा. UAN आणि पासवर्ड टाकून खात्यात लॉग इन करा. यानंतर, ‘मॅनेज’ टॅबमधील KYC पर्यायावर क्लिक करा. जर तुम्हाला आधार क्रमांक टाकायचा नसेल तर तुम्ही व्हर्च्युअल आयडी क्रमांक टाकू शकता. त्यानंतर आधार बेस्ड ऑथेंटिकेशनसाठी मंजुरी द्यावी लागेल. त्यानंतर ‘सेव्ह’ बटणावर क्लिक करा. आता तुमची विनंती ‘पेंडिंग केवायसी’ मध्ये दिसेल आणि तुमच्या एम्प्लॉयरला त्याची मंजुरी द्यावी लागेल जेणेकरून UAN आधारशी लिंक करता येईल. एकदा मंजूर झाल्यानंतर, प्रदान केलेला डेटा UIDAI डेटासह वेरिफाई केला जाईल. EPFO कडून मंजुरी मिळाल्यानंतर, आधार तुमच्या PF खात्याशी लिंक केला जाईल. आणि तुम्हाला तुमच्या आधार माहितीसमोर Verify लिहिलेले दिसेल.

• First Published : August 30, 2022, 12:21 pm IST