उल्हासनगर, 2 फेब्रुवारी : उल्हासनगर शहरातील मनसेचे जिल्हा उपाध्यक्ष प्रदीप गोडसे यांना अज्ञात दुचाकीस्वारांनी फरफटत नेल्याचा प्रकार सीसीटीव्हीतून समोर आला आहे. कॅम्प चारच्या लालचक्की भागातील सोमवारी रात्री घडलेला प्रकार आहे. भर रस्त्यात घडलेल्या या घटनेमुळे शहरात एकच खळबळ उडाली. मनसे आमदार राजू पाटील यांच्याकडील बैठक संपवून गोडसे हे रात्री साडेदहाच्या सुमारास लालचक्की येथील आपल्या जनसंपर्क कार्यालयासमोर फोनवर बोलत उभे होते. याच वेळी दुचाकीवर आलेल्या अज्ञात दोघांनी गोडसे यांच्या गळ्याभोवती फास आवळत त्यांना फरफटत नेत रस्त्यावर फेकले. या हल्लेखोरांनी हातावर वार केल्याचे गोडसे यांनी सांगितलं आहे. यात त्यांच्या हाताला किरकोळ दुखापत झाली आहे.
अचानकपणे झालेल्या या हल्ल्यामुळे बेसावध असलेले गोडसे जमिनीवर पडले. सुरुवातीला विठ्ठलवाडी पोलीस ठाण्यात या प्रकरणी अदखल पात्र गुन्हा नोंदवण्यात आला होता. दरम्यान, मोबाईल स्नॅचिंग करण्याचा हा प्रयत्न असल्याचं पोलिसांचं म्हणणं असून, त्यानुसार तक्रार दाखल केल्याचं वरिष्ठ पोलीस निरीक्षकांनी सांगितलं आहे.