CBSC 10th Results: 90 टक्के गुण मिळवणाऱ्या विद्यार्थ्यांच्या संख्येनं गाठला चार वर्षांचा उच्चांक; अकरावी प्रवेशासाठी रस्सीखेच
मुंबई, 22 जुलै: केंद्रीय माध्यमिक शिक्षण मंडळानं (CBSC) बारावीपाठोपाठ शुक्रवारी दहावीचा निकालही (10th Results) जाहीर केला आहे. गेल्या अनेक दिवसांपासून या निकालाची प्रतीक्षा होती. निकाल जाहीर न झाल्यानं अकरावीची प्रवेश प्रक्रियाही रखडली होती. देशातील 22 हजार 731 शाळांमधून तब्बल 21 लाख 9 हजार 208 विद्यार्थ्यांनी दहावीच्या परीक्षेसाठी नोंदणी केली होती. सीबीएसईच्या पुणे विभागात महाराष्ट्र, गोवा, दिव-दमण, दादरा आणि नगर हवेली यांचा समावेश होत असून येथील दहावीचे 97.41 टक्के विद्यार्थी उत्तीर्ण झाले आहेत. 90 आणि 95 टक्क्यांहून अधिक गुण मिळवणाऱ्या विद्यार्थ्यांच्या संख्येत लक्षणीय वाढ- केंद्रीय माध्यमिक शिक्षण मंडळाच्या दहावीच्या निकालात 90 आणि 95 टक्क्यांहून अधिक गुण मिळवणाऱ्या विद्यार्थ्यांच्या संख्येत लक्षणीय वाढ झाली आहे. उत्तर प्रदेशातील शामली जिल्ह्यातील विद्यार्थीनी दिया नामदेव हीनं शंभर टक्के गुण मिळवून देशात प्रथम क्रमांक मिळवला आहे. दहावीच्या 2020 मधील निकालाच्या तुलनेत 2022 निकालात 2.94 टक्क्यांनी वाढ झाली आहे. 2020 मध्ये दहावीचा निकाल 91.46 टक्के लागला होता. परदेशातील शाळांमधून 24,843 विद्यार्थ्यांनी परीक्षा दिली, त्यातील 24 हजार 169 विद्यार्थी म्हणजे 97.29 टक्के विद्यार्थी परीक्षेत यशस्वी ठरले आहेत. परीक्षा दिलेल्या 95.29 टक्के विद्यार्थिनी, तर 93.80 टक्के विद्यार्थी उत्तीर्ण झाले आहेत. विद्यार्थिनींच्या उत्तीर्णतेची टक्केवारी विद्यार्थ्यांच्या तुलनेत 1.41 टक्क्यांनी जास्त आहे. हेही वाचा- CBSE 12th Result 2022: अखेर प्रतीक्षा संपली; CBSE12वीचा निकाल जाहीर; असा लगेच बघा तुमचा Result कोरोनामुळं प्रथमच झाली ऑफलाइन परीक्षा- कोरोनामुळं यंदा प्रथमच ऑफलाइन परीक्षा पार पडली. यंदा उत्तीर्णांच्या संख्येत मोठी वाढ झाली असून 90 टक्के आणि 95 टक्क्यांपेक्षा जास्त गुण मिळवणाऱ्या विद्यार्थ्यांच्या संख्येनंही चार वर्षांचा उच्चांक गाठला आहे. गतवर्षी कोरोनामुळं बोर्डाच्या परीक्षा होऊ शकल्या नव्हत्या. 2020 च्या आकड्यांशी तुलना करता यंदा 95 टक्क्यांपेक्षा जास्त गुण मिळवणाफ्या विद्यार्थ्यांची संख्या 55 टक्क्यांनी वाढून ती 41806 वरून 64908 वर पोहोचली आहे. तर 90 टक्क्यांपेक्षा जास्त गुण मिळवणाऱ्या विद्य़ार्थ्यांची संख्या 2.37 लाखांवर पोहोचली आहे. 2020 मध्ये ही संख्या 1.84 लाख होती. देशामध्ये दहावीच्या परिक्षेत देशातील उत्तीर्ण विद्यार्थ्यांच्या संख्येत 3 टक्के वाढ झाली आहे. अकरावी प्रवेशासाठी करावी लागणार कसरत- दहावीमध्ये 90 आणि 95 टक्क्यांपेक्षा जास्त गुण मिळवणाऱ्या विद्य़ार्थ्यांच्या संख्येत वाढ झाली आहे. परंतु या निकालाचा परिणाम अकरावी प्रवेशावर होणार आहे. यंदाच्या या वाढलेल्या संख्येमुळं अकरावासाठी चांगल्या संस्थेत प्रवेश घेऊ पाहणाऱ्या विद्यार्थ्यांमध्ये मोठी स्पर्धा पाहायला मिळणार आहे. चांगल्या संस्थेत प्रवेश घेण्यासाठी विद्यार्थ्यांसोबतच त्यांच्या पालकांचाही कस लागणार आहे.