आपण आपल्या घरातील आईवर जेवढे प्रेम करतो तेवढंच प्रेम ग्रामीण भागात शेतकरी आजही गाईवर करतो. गर्भवती महिलेच्या पोटातल्या बाळावर गर्भसंस्कार पार पडावेत. म्हणून गर्भवती महिलांची ओटी भरणे अर्थात डोहाळे जेवण कार्यक्रम आयोजित करण्याची आपल्याकडे प्रथा आहे.
बीड जिल्ह्यातील कडा या गावच्या रहिवासी असणाऱ्या जयश्री देशमुख यांच्या कुटुंबाने आपल्या कपिला या लाडक्या गाईचे डोहाळे जेवण घालून एक अनोखा संदेश दिला आहे.
'कुणी तरी येणार येणार गं' म्हणत डोहाळे जेवण भरवले जात असते. मात्र, हेच डोहाळे जेवण एका गाईचे असल्याने आपल्याला नवल वाटेल. अशा या अनोख्या डोहाळे जेवणाचा कार्यक्रम साजरा करण्यासाठी संपूर्ण गाव जमा झाला होता.
डाळीचे पीठ, तेल, आणि शाम्पू लावून गाईला गरम पाण्याने आंघोळ घालण्यात आली. कपिलासाठी सोळा प्रकारचा श्रृंगार साज चढवण्यात आला. यात नथ, कंबरपट्टा, मंगळसूत्र, पायातले, सरी बांगड्या, मोत्याची नथ, हळद, कुंकू, कानातले, फुलांचा हार, याचा समावेश करण्यात आला ही संपूर्ण सजावट नम्रता देशमुख यांनी केली.
साज चढवून कपिलाची गावातून वाजत गाजत ढोल ताशाच्या गजरात मिरवणूक काढली. त्यानंतर कपिलाची ओटी भरून औक्षण देखील केले. यावेळी कपिलासाठी वाली, भात, मका, पेंड, गवताचा चारा, लापशी असे दहापेक्षा अधिक खाद्यपदार्थ होते. यासाठी एकूण 20 हजारांचा खर्च देशमुख कुटुंबियांना आला आहे.
कार्यक्रमावेळी उपस्थित गोपाळांना गाईची पितळी मूर्ती, दूध, तूप, वाटण्यात आले. मुक्या जनावरांच्या प्रेमापोटी हा कार्यक्रम केला असल्याचे नम्रता देशमुख यांनी सांगितले. या अनोख्या कार्यक्रमाची चर्चा पंचक्रोशीत होत आहे.
6 फोटो