नवी दिल्ली, 28 ऑगस्ट : काँग्रेस अध्यक्षपदासाठी 17 ऑक्टोबरला निवडणूक होणार आहे. तर 19 ऑक्टोबरला मतमोजणी होणार आहे. मिळालेल्या माहितीनुसार, 22 सप्टेंबर रोजी निवडणुकीची अधिसूचना जारी होणार आहे. दिग्गज नेता गुलाम नबी आझाद यांच्या राजीनाम्यानंतर, काँग्रेस आणि त्यांच्या पुढील अध्यक्षांच्या भवितव्यावर प्रश्न उपस्थित होत असताना पक्षाच्या केंद्रीय कार्यकारिणीची (CWC) रविवारी बैठक झाली. या बैठकीत काँग्रेस पक्षाच्या नूतन अध्यक्ष आणि पक्षाच्या पुढील अध्यक्षांच्या निवडीच्या तारखांबाबत चर्चा करण्यात आली. मिळालेल्या माहितीनुसार, पक्षातील काही ज्येष्ठ नेत्यांनी पुढील अध्यक्ष कोण होणार याबाबत संकेत दिले आहे. पक्षाचे ज्येष्ठ नेते हरीश रावत म्हणाले की, राहुल गांधीच काँग्रेसचे अध्यक्ष होणार आहेत. आम्हाला आशा आहे की, राहुल गांधी काँग्रेसचे अध्यक्षपद स्वीकारतील. अध्यक्षपद स्वीकारावं अशी त्यांना विनंतीही यावेळी रावतांनी केली. त्याशिवाय मल्लिकार्जुन खरगे यांनीह राहुल गांधींना अध्यक्ष व्हावे, असं म्हटलं आहे. राहुल गांधींनी पुढे जाऊन काँग्रेसचे अध्यक्षपद स्वीकारावे अशी माझ्यासह अनेक कार्यकर्त्यांची इच्छा आहे. तेच काँग्रेस पक्षाला संघटित करून मजबूत करू शकतात, असंही ते यावेळी म्हणाले. अखेर काँग्रेसला पूर्णवेळ अध्यक्ष मिळणार! 17 ऑक्टोबरला निवडणूक, ही नावं चर्चेत सोनिया गांधी यांनी व्हर्च्युअली उपस्थित राहून बैठकीचे अध्यक्षपद भूषवले. त्यांच्यासोबत राहुल गांधी आणि प्रियांका गांधी वॉड्राही उपस्थित होते. विशेष म्हणजे सोनिया गांधी सध्या वैद्यकीय तपासणीसाठी परदेश दौऱ्यावर असून राहुल गांधी आणि प्रियांका गांधीही त्यांच्यासोबत आहेत. काँग्रेसने काही दिवसांपूर्वी नवीन अध्यक्ष निवडीची प्रक्रिया पुढे ढकलली होती. काँग्रेसने गेल्या वर्षी ऑक्टोबरमध्ये जाहीर केले होते की, या वर्षी 21 ऑगस्ट ते 20 सप्टेंबर दरम्यान आपल्या नवीन अध्यक्षाची निवडणूक होणार आहे.