नवी दिल्ली, 23 डिसेंबर : CBI ने ICICI बँकेच्या माजी सीईओ चंदा कोचर आणि त्यांचे पती दीपक कोचर यांना भ्रष्टाचाराच्या प्रकरणात अटक केली आहे. कोचर दाम्पत्याला दिल्लीतून अटक करण्यात आली आहे. सीबीआयने चंदा कोचर यांना खोटारडेपणा आणि गुन्हेगारी कटाच्या आरोपाखाली अटक केली. CNBC TV18 च्या बातमीनुसार, CBI ने कोचर दाम्पत्याला व्हिडिओकॉन कर्ज प्रकरणात आरोपी मानून नियमांचे उल्लंघन केल्याबद्दल अटक केली आहे. सीबीआयच्या म्हणण्यानुसार, 2009 ते 2011 दरम्यान, आयसीआयसीआय बँकेने व्हिडिओकॉनला 6 उच्च मूल्याची कर्जे दिली होती. हे कर्ज देणाऱ्या समितीमध्ये चंदा कोचर यांचाही समावेश होता. यापूर्वी ईडीने 3000 कोटींच्या कर्ज घोटाळ्याप्रकरणी त्यांच्यावर मनी लाँड्रिंगचा गुन्हा दाखल केला होता. या आरोपांनंतर त्यांना 2018 मध्ये आपल्या पदाचा राजीनामा द्यावा लागला होता. या कर्जाच्या बदल्यात व्हिडिओकॉनच्या प्रवर्तकांनी चंदा कोचर यांच्या पतीला कोट्यवधी रुपये दिल्याचा सीबीआयचा आरोप आहे. हेही वाचा - रेशनचं मोफत धान्य मिळवण्यात अडचण येतीये? ‘या’ क्रमांकांवर करा तक्रार सीबीआयने कोचर दाम्पत्याला दिल्लीत अटक केली असली तरी त्यांना मुंबईत हजर करण्यात येणार आहे. चंदा कोचर यांनी कर्ज वाटपात अनियमितता केल्याचा सीबीआयचा आरोप आहे. कर्जाच्या बदल्यात त्यांनी व्हिडिओकॉनच्या प्रवर्तकांकडून मोठी रक्कम घेतली होती.