अलका कुबल
मुंबई, 17 एप्रिल: वर्षानुवर्षे प्रेक्षकांच्या मनावर अधिराज्य गाजवणारी अभिनेत्री म्हणजे अलका कुबल. आजपर्यंत त्यांनी आपल्या निर्मळ हास्याने प्रेक्षकांच्या मनावर मोहिनी घातली आहे. त्यांनी केलेल्या भूमिकांचा ठसा आजही प्रेक्षकांच्या मनावर कायम आहे. त्यांचा चेहरा समोर आला कि आपसूकच देवीच्या रूपातील त्या दिसतात असं म्हणणं वावगं ठरणार नाही. त्यांच्या ‘माहेरची साडी’ या सिनेमाने तर अनेक विक्रम मोडले. त्यांची अनेक चित्रपटातील सोशिक सुनेची प्रतिमा आजवर कुणीही पुसू शकलेलं नाही. त्यांच्या माहेरच्या साडी चित्रपटावर हिंदी सिनेमा देखील आला. पण त्यात अलका कुबल यांच्या जागेवर दुसरी अभिनेत्री दिसली. आता आजवर अलका कुबल यांनी हिंदी चित्रपटात काम का केलं नाही याबद्दलचं कारण समोर आलं आहे. खुद्द अभिनेत्रीनेच याविषयी खुलासा केला आहे. अलका यांनी मराठी मालिका, नाटक, चित्रपट या सर्वच क्षेत्रात काम केलं. मराठीत काम केल्यावर अनेक अभिनेत्री हिंदी चित्रपटसृष्टीकडे आपला मोर्चा वळवतात. पण अलका आजवर कुठल्याच हिंदी चित्रपटात भूमिका साकारताना दिसल्या नाहीत. त्यांना आजवर अनेक हिंदी चित्रपटांच्या ऑफर आल्या मात्र त्यांनी यासाठी नकार दिला. त्यामागची त्यांची कारणं काय होती याचा खुलासा ललिता ताम्हणे यांनी ‘चंदेरी सोनेरी’ या पुस्तकात केला आहे.
प्रत्येकच कलाकाराला हिंदीमध्ये काम करावं असं वाटत असतं मग तुम्हाला बॉलिवूडमध्ये काम करावंसं वाटत नाही का? असा प्रश्न विचारल्यावर अलका कुबल म्हणालेल्या, ‘‘माहेरची साडी’ चित्रपटानंतर मला अनेक हिंदी चित्रपटांच्या ऑफर मिळाल्या मात्र मी त्या नाकारल्या. मी ‘धार’ नावाच्या एका हिंदी चित्रपटात पाहुणी कलाकार म्हणून भूमिका साकारली होती. यात मी एका पत्रकार मुलीच्या भूमिकेत होते. चित्रपटात ती भूमिका फारच महत्त्वाची होती. अनेकदा मी भूमिका निवडताना तिची लांबी न बघता त्याची गरज बघते. ते पात्र चित्रपटात किती महत्वाचं आहे ते पाहते. या चित्रपटाचा दिग्दर्शक माझ्या सहकलाकाराच्या ओळखीचा असल्याने मी ती भूमिका केली. पण हिंदी चित्रपटासाठी वाट्टेल तसे तोकडे ड्रेस घालण्याची आणि शरीरप्रदर्शन करायची माझी मुळीच तयारी नव्हती.’ Alia and Ranbir: नवरा असावा तर असा! लग्नाच्या वाढदिवशी रणबीरनं आलियाला दिलं इतकं महागडं गिफ्ट; लाखांमध्ये आहे किंमत याविषयीच बोलताना अलका कुबल पुढे म्हणाल्या, ‘तसंच हिंदी चित्रपटात उगाचच छोटंसं पात्र साकारण्यापेक्षा मराठी चित्रपटात नायिका म्हणून भूमिका करणं केव्हाही चांगलंच नाही का? मी दिग्दर्शक ज्योती स्वरूप यांच्या ‘नया ज़हर’ नावाच्या एका हिंदी चित्रपटात पाहुण्या कलाकाराची भूमिका केली होती. पण तो चित्रपट अजिबात चालला नाही. तो चित्रपट कधी आला आणि कधी गेला हेसुद्धा कोणाला कळलं नाही. त्यामुळे अशा भूमिका करून काहीही उपयोग नाही हे मला जाणवलं. त्यामुळे मी ठरवलं की हिंदी चित्रपटात अशा छोट्या भूमिका अजिबात करायच्या नाहीत.’ अलका यांनी हिंदी चित्रपटांबद्दल मांडलेलं हे मत अनेक चाहत्यांना अगदी पटलं आहे. अलका कुबल यांनी आपली मर्यादा राखतंच आजवर काम केलं म्हणूनच त्यांना आजही प्रेक्षकवर्ग त्यांना मान देतो असं म्हणणं वावगं ठरणार नाही.