तब्बल दोन तास हवेत घिरट्या घालत होतं विमान; प्रवाशांचा जीव टांगणीला, अखेर असं उतरवलं जमिनीवर

हे प्रकरण नेपाळची राजधानी काठमांडू येथील त्रिभुवन विमानतळावरचं आहे. विमान उतरताच लोकांनी टाळ्या वाजवल्या. विमान खाली उतरताच कोणातीही दुर्घटना घडू नये यासाठी अग्निशमन दलाची गाडी आणि रुग्णवाहिका विमानाच्या दिशेने धावली होती.

याचं कारण विमानातल्या 73 प्रवाशांचा जीव दोन तास अक्षरशः टांगणीला होता. प्रत्येक सेकंदात मृत्यूच्या छायेत ते जगत होते. त्यांच्या विमानाचं लँडिंग गिअरच खराब झालं होतं.

नेपाळची स्थानिक विमान कंपनी बुद्ध एअरचं हे विमान सोमवारी सकाळी विराटनगरमध्ये उतरणार होतं. पण लँडिंगआधी अचानक गिअरमध्ये तांत्रिक बिघाड झाला.

जेव्हा विराटनगरमध्ये विमानाचे लँडिंग यशस्वी झालं नाही, तेव्हा एकच खळबळ उडाली. विमान परत काठमांडूला नेण्यात आलं. तिथे धावपट्टीवर फोम लावून फोर्स लँडिंगची तयारी केली जात होती.

अखेर वैमानिक, तंत्रज्ञ सगळ्यांच्याच प्रयत्नातून हे विमान 73 प्रवाशांसह सुखरूप धावपट्टीवर उतरलं आणि सुटकेचे निश्वास टाकले गेले.