इलेक्ट्रॉनिक्स आणि माहिती तंत्रज्ञान मंत्रालयाने सरकारी सेवा ऑनलाईन रुपात लोकांपर्यंत पोहचवण्यासाठी उमंग अ‍ॅपची (Umang App) सुविधा आणली आहे. डिजीटल इंडिया कार्यक्रम आणि आत्मनिर्भर भारत अंतर्गत इलेक्ट्रॉनिक्स आणि माहिती तंत्रज्ञान मंत्रालयाने मॅप माय इंडियासह (Map my India) एक भागीदारी केली आहे. यामुळे उमंग अ‍ॅपमध्ये मॅपची सुविधादेखील मिळते.
उमंग अ‍ॅपमध्ये सरकारी सेवांसह इतरही गोष्टींची माहिती दिली जात असल्याने सर्वसामान्यासाठी हे अ‍ॅप महत्त्वाचं ठरतं. मॅप माय इंडियासह सामंजस्य करारातून उमंग अ‍ॅपमध्ये मॅप सर्विस (Map Service) सक्षम केल्या आहेत.
मॅप माय इंडियासह लिंक केल्यानंतर युजर्सला एका क्लिकवर आसपासच्या सरकारी सेवा, भाजी मार्केट, ब्लड बँक, ESIC रुग्णालयं यासारख्या अनेक गोष्टींची माहिती मिळेल.
उमंग अ‍ॅप आणि मॅप माय इंडिया यांच्या माध्यमातून नेव्हिगेशनदरम्यान रहदारी आणि रस्ता सुरक्षा सतर्कता, ड्रायव्हिंग अंतर, दिशानिर्देशक, व्हिज्युअल मार्गदर्शनही नागरिक मिळवू शकतात.
umang.gov.in पोर्टलनुसार, हे सरकारी अ‍ॅप उमंग कस्टमरशी संबंधित सेवा आधार, ईपीएस, एनपीएस, डिजीलॉकर आणि इतर अनेक सुविधा उपलब्ध करून देतो. या अ‍ॅपवरुन पीएफ अकाउंटशी आधार नंबर लिंकही करता येतो.
Umang App द्वारे युजर्स आधार, पॅन, पीएफ, पासपोर्ट, ड्रायव्हिंग लायसन्ससह अनेक सुविधांचा फायदा घरबसल्या घेऊ शकतात.