मुंबई, 20 फेब्रुवारी : इंडियन प्रीमियर लीग स्पर्धेच्या या सिझनसाठी (IPL 2020) खेळाडूंच्या लिलावाची प्रक्रिया पार पडली आहे. आरसीबीला आजवर एकदाही आयपीएल स्पर्धा जिंकता आलेली नाही. विजेतेपदाची ही प्रतीक्षा संपवण्यासाठी आरसीबीनं यावेळी काही खेळाडूंना जबरदस्त बोली लावून खरेदी केलं आहे. यामध्ये ऑस्ट्रेलियाचा ऑलराऊंडर ग्लेन मॅक्सवेल (Glenn Maxwell) आणि न्यूझीलंडचा नवा स्टार खेळाडू कायले जेमिसन (Kyle Jamieson) यांना आरसीबीनं मोठी रक्कम देऊन खरेदी केलं आहे. रॉयल चॅलेंजर्स बंगळुरुचा (RCB) कॅप्टन विराट कोहलीनं (Virat Kohli) या लिलावावर पहिली प्रतिक्रिया दिली आहे. काय म्हणाला विराट? ग्लेन मॅक्सवेलला आरसीबीनं 14 कोटी 25 लाख रुपयांना तर कायले जेमिसनला 15 कोटींना खरेदी केलं आहे. रॉयल चॅलेंजर्स बंगळुरुच्या अधिकृत ट्वीटर हँडलवर विराटचा एक व्हिडीओ प्रसिद्ध केला असून त्यामध्ये त्यानं नव्या खेळाडूंच्या निवडीवर समाधान व्यक्त केलं आहे.
“आयपीएल ऑक्शनचा निकाल चांगला होता. त्यामुळे मी आनंदी आहे. आम्हाला ज्या प्रकारची टीम, जसं संतुलन हवं होतं ते मिळालं आहे. आमच्यासाठी मागचा सिझन चांगला होता. यंदा नवे खेळाडू आणि नव्या अपेक्षांसह आम्ही आगेकूच करणार आहोत. आरसीबीच्या फॅन्सनी येत्या सिझनमध्येही आम्हाला पाठिंबा द्यावा. असं आवाहन मी करत आहे,’’ अशी प्रतिक्रिया विराटनं दिली आहे.
आरसीबीनं या सिझनसाठी मॅक्सवेल आणि जेमिसन शिवाय डॅनियल ख्रिस्टीन, मोहम्मद अझहरुद्दीन, सचिन बेबी, सुयश प्रभूदेसाई, केएस भरत आणि रजत पाटीदार या खेळाडूंना करारबद्ध केलं आहे.