श्याम शरण नेगी यांचा जन्म कल्पा, किन्नौर याठिकाणी जुलै 1917 साली झाला. वयाच्या 10 व्या वर्षी शाळेत गेलेल्या नेगी यांनी कल्पामध्ये पाचवीपर्यंत शिक्षण घेतले. नववीपर्यंतचे शिक्षण रामपूरमध्येच झाले. वय जास्त असल्याने त्यांना दहावीला प्रवेश मिळाला नाही. मास्टर श्याम शरण नेगी यांनी सुरुवातीला 1940 ते 1946 या काळात वनविभागात वनरक्षक म्हणून काम केले. त्यानंतर ते शिक्षण विभागात गेले आणि कल्पा लोअर मिडल स्कूलमध्ये शिक्षक म्हणून कार्यरत होते.
एकीकडे देशातील मोठा वर्ग मतदानाकडे पाठ फिरवत असताना, या आजोबांनी मात्र सर्वांसमोर आदर्श ठेवला आहे. स्वतंत्र भारताचे पहिले मतदार, 104 वर्षीय श्याम सरन नेगी यांनी शनिवारी हिमाचल प्रदेशातील किन्नौर जिल्ह्यातील कल्पा या मतदान केंद्रावर मंडी लोकसभा पोटनिवडणुकीत मतदान केले.
या वयातही तोच जोश, तोच उत्साह दाखवत श्याम सरन नेगी यांनी मतदान केले आहे. स्वतंत्र भारताचे पहिले मतदार असणाऱ्या नेगी यांनी वयाच्या 104 वर्षी किन्नौर जिल्ह्यातील कल्पा येथील मतदान केंद्रावर मतदान केले.
जिल्हा प्रशासनाच्या वतीने श्याम सरन नेगी यांना त्यांच्या घरातून वाहनाने कल्पा मतदान केंद्रावर आदरपूर्वक आणण्यात आले.
मास्टर श्याम सरन नेगी मतदान करण्यासाठी 12:40 च्या सुमारास कल्पा बूथवर पोहोचले, तेथे जिल्हा किन्नौर प्रशासन आणि स्थानिक ग्रामस्थांनी त्यांचे भव्य स्वागत केले.
नेगी यांच्या स्वागतासाठी किन्नौर जिल्हा प्रशासनाने खास रेड कार्पेट अंथरले होते. त्याचवेळी पारंपरिक वाद्यांच्या गजरात त्यांचे स्वागत करण्यात आले.
मास्टर श्याम शरण नेगी बूथवर पोहोचल्यावर जिल्हा निवडणूक अधिकारी आणि उपायुक्त किन्नौर अपूर्व देवगण यांनी किन्नौरी टोपी आणि मफलर घालून त्यांचे स्वागत केले
मास्टर श्याम शरण नेगी यांनी 1951 मध्ये पहिल्यांदा लोकसभा निवडणुकीसाठी मतदान केले होते. लोकसभेच्या निवडणुका 1952 मध्ये झाल्या असल्या तरी बर्फवृष्टीमुळे किन्नौरच्या कल्पामध्ये सहा महिने आधीच मतदान झाले.