मुंबई, 20 जून : राज्यसभेप्रमाणे विधान परिषद निवडणुकीतही कुठलीही चूक होऊ नये म्हणून महाविकास आघाडीतील पक्षांनी विशेष काळजी घेतली होती. आमदारांना फाईव्हस्टार हॉटेलमध्ये राहण्याच्या सोयीपासून मतदान कसं करायचं? इथपर्यंत तालीम देण्यात आली होती. असे असतानाही आघाडीची एकदोन नाही तर तब्बल 21 मतं फुटली आहे. राज्यसभेप्रमाणे विधान परिषद निवडणुकीतही (MLC Election result ) देवेंद्र फडणवीस (Devendra Fadnavis) यांचा करिश्मा पाहायला मिळाला आहे. या निवडणुकीत भाजपचे पाचही उमेदवार विजयी झाले. श्रीकांत भारतीय, राम शिंदे, प्रविण दरेकर, उमा खापरे आणि प्रसाद लाड हे पाचही उमेदवार विजयी झाले आहेत. आज झालेल्या विधान परिषद निवडणुकीत राष्ट्रवादीचे रामराजे निंबाळकर, एकनाथ खडसे, शिवसेनेचे आमशा पाडवी, काँग्रेसचे चंद्रकांत हंडोरे, शिवसेनेचे सचिन अहिर हे पाच उमेदवार विजयी झाले असून काँग्रेसचे भाई जगताप यांना मात्र अपयशाला सामोरं जावं लागलं आहे. देवेंद्र फडणवीस आणि त्यांच्या टीमने हा चमत्कार घडवून आणल्याचं म्हटलं जात आहे. फडणवीसांचा जादू कायम विधान परिषदेच्या 10 जागांसाठी मतदान प्रक्रिया पार पडली. 10 जागांसाठी 11 उमेदवार मैदानात असल्यामुळे त्यातच गुप्त मतदान असल्यामुळे कोणत्या पक्षाचा उमेदवार निवडून येणार याची कमाली उत्सुकता शिगेला पोहोचली होती. राज्यसभा निवडणुकीमध्ये देवेंद्र फडणवीस यांनी चमत्कार घडवत भाजपचे तिन्ही उमेदवार विजयी झाले होते. त्यामुळे शिवसेनेचे उमेदवार संजय पवार पराभूत झाले होते. त्यामुळे विधान परिषदेसाठी मुख्यमंत्री उद्धव ठाकरे यांनी सर्व सूत्र आपल्या हातात घेतली होती. त्यांनी सर्व आमदार आपल्याच देखरेखीखाली ठेवली होती. मतदानाच्या दिवशीही मुख्यमंत्र्यांनी सर्व आमदारांशी चर्चा करूनच मतदानाला पाठवले होते. यावेळी शिवसेनेनं कोणताही दगाफटका नको म्हणून आपल्याच आमदारांच्या संख्याबळावर आपले उमेदवार विजयी करण्यावर भर दिला होता. काँग्रेसचे भाई जगताप पराभूत महाविकास आघाडीच्या एकूण मतांमध्ये काँग्रेसची 3 मतं फुटल्याचेही समोर आले आहे. काँग्रेसला आपल्या 44 मतापैंकी फक्त 41 मतं मिळाली आहेत.