देशातील सर्वात मोठी सरकारी बँक असणाऱ्या एसबीआयने (State Bank of India) ग्राहकांच्या हितासाठी महत्त्वाचा निर्णय घेतला आहे. यामुळे तुमच्या दर महिन्याच्या EMI मध्ये बचत होणार आहे.
स्टेट बँक ऑफ इंडिया (SBI-State Bank of India)ने ग्राहकासाठी मोठी घोषणा केली आहे. बँकेने कर्जामधील मुख्य दर एमसीएलआर- मार्जिनल कॉस्ट ऑफ लेंडिंग रेट (MCLR-Marginal Cost of Funds based Lending Rate) संदर्भात हा निर्णय घेतला आहे.
बँकेने त्यांच्या एका ट्वीटमध्ये म्हटले आहे की, व्याज कपातीचा फायदा एका वर्षाची वाट न बघता घ्या. एसबीआयने MCLR रिसेट फ्रिक्वेंसी 1 वर्षांवरून घटवून सहा महिने केली आहे. कर्जधारकांना कमी होणाऱ्या व्याजाचा फायदा घेण्यासाठी एका वर्षाची वाट पाहावी लागणार नाही. सध्या एसबीआयचा एक वर्षासाठी एमसीएलआर 7 टक्के तर 6 महिन्याचा MCLR 6.95 टक्के आहे.
साधारणत: बँक MCLR लिंक्ड लोन एका वर्षाच्या रिसेट फ्रिक्वेन्सीसह ऑफर करतात. याचा अर्थ असा की कर्ज घेणाऱ्यांना बँकेच्या एमसीएलआर कपातीनुसार ईएमआयमधील कपातीचा फायदा घेण्यासाठी अधिक वेळ लागतो. यामुळे कर्जधारकांना आरबीआयद्वारे घोषणा केलेल्या पॉलिसी रेट कपातीचा फायदा मिळणे कठीण होते.
जर गृहकर्ज एमसीएलआर आधारित व्याज दराशी जोडलेले असेल तर ईएमआयची रक्कम केवळ गृहकर्ज रिसेट डेटच्या दिवशीच बदलते, ही तारीख बँकेच्या एमसीएलआर मध्ये सुधारणा झाल्यावर लगेच येते. उदा. तुमच्या गृहकर्जाची रिसेट डेट जानेवारीमध्ये येत असेल आणि बँकेने जुलैमध्ये एमसीएलआरमध्ये बदल केले, तर तुमच्या ईएमआयवर त्याचा परिणाम पुढच्या वर्षी जानेवारीमध्ये दिसेल.