Post Office: IPPB मध्ये खातं असेल तर लक्ष द्या! 1 ऑगस्टपासून या सेवेसाठी द्यावे लागणार अधिक पैसे

पोस्ट ऑफिसच्या (Post Office) इंडिया पोस्ट पेमेंट्स बँकेकडून ग्राहकांना विविध सेवा पुरवण्यात येतात. दरम्यान ठराविक कालावधीनंतर या बँकेच्या सेवाशुल्कात, व्याजरात बदलही केले जातात.

तुमचे देखील इंडिया पोस्ट पेमेंट बँकेत (india post payments bank) खातं असेल तर ही बातमी तुमच्यासाठी अत्यंत महत्त्वाची आहे. बँक 1 ऑगस्टपासून डोअरस्टेप बँकिंग (doorstep banking charges) साठी देखील शुल्क आकारणार आहे.

याशिवाय बँकेने 1 जुलैपासून व्याजदरात देखील कपात केली आहे, त्यामुळे बँकेकडून मिळणारे काही फायदे देखील घटले आहेत. आयपीपीबीने याबाबत माहिती दिली आहे. सध्या डोअरस्टेप बँकिंगसाठी कोणतंही शुल्क आकारलं जात नाही, मात्र 1 ऑगस्टपासून यामध्ये बदल होणार आहे.

1 ऑगस्टपासून इंडिया पोस्ट पेमेंट बँकेत डोअरस्टेप बँकिंग (doorstep banking charges) साठी प्रति कस्टमर 20 रुपये प्रति रिक्वेस्ट आकारण्यात येणार आहेत.

बँकेने अलीकडेच व्याजदरातही कपात केली होती. 1 जुलैपासून IPPB मध्ये बचत खातं उघडणाऱ्यांना कमी दराने व्याज मिळणार आहे. IPPB च्या ग्राहकांना 1 लाख रुपयांपर्यंतच्या बॅलन्सवर सुरुवातीला 2.75 टक्के दराने व्याज मिळत असे. यामध्ये आता 25 बेसिस पॉइंट्सची कपात करण्यात आली होती. त्यानंतर व्याजदर 2.50 टक्के झाला आहे

जुलै ते सप्टेंबर या तिमाहीसाठी ग्राहकांना 2.5 टक्के दराने व्याज मिळेल.

आयपीपीबी मध्ये ऑनलाइन बँक खाते उघडण्याची प्रक्रिया- 1) गुगल प्ले स्टोअरवरून आयपीपीबीचे App डाऊनलोड करा 2) त्याठिकाणी देण्यात आलेल्या ओपन युअर अकाऊंट नाऊ (Open Your Account Now) वर क्लिक करा. 3) त्यानंतर तुमचा मोबाइल नंबर टाका 4) याठिकाणी तुमच्या पॅन क्रमांकाची आणि आधार क्रमांकाची गरज भासेल 5) त्याठिकाणी आधारवर रजिस्टर्ड मोबाइल क्रमांकावर ओटीपी येईल 6) यानंतर काही वैयक्तिक माहिती प्रविष्ट करावी लागेल- शैक्षणिक पात्रता, पत्ता, नॉमिनेशन इ. 7) सबमिट केल्यानंतर तुमचे अकाउंट उघडले जाइल आणि App च्या माध्यमातून ते वापरता येईल.

विद्यमान ग्राहकांनी आयपीपीबी अ‍ॅप कसे वापरावे- 1) IPPB APP मध्ये जाऊम तुम्हाला अकाऊंट नंबर, कस्टमर आयडी, जन्मतारिख आणि रजिस्टर्ड मोबाइल क्रमांक टाकावा लागेल. 2) रजिस्टर्ड मोबाइल क्रमांकावर एक ओटीपी पाठवला जाईल 3) त्यानंतर MPIN सेट करून ओटीपी टाकावा लागेल. अशाप्रकारे विद्यमान ग्राहकांची नोंदणीची प्रक्रिया पूर्ण होईल