sukanya samriddhi yojana
मुंबई, 14 सप्टेंबर: अलीकडच्या काळात पालक आपल्या मुलांच्या भविष्याबाबत खूपच जागरूक असतात. खासकरून मुलीच्या जन्मानंतर पालकांना तिच्या भविष्याची आणि लग्नाची जास्त काळजी असते. त्यामुळं ते लवकरात लवकर गुंतवणूकीला सुरुवात करतात. यामाध्यमातून आपल्या मुलीचं भविष्य सुरक्षित करण्याचा त्यांचा प्रयत्न असतो. मात्र आजच्या वाढत्या महागाईच्या काळात वाढलेल्या खर्चामुळं लोकांच्या बचतीवर मोठा परिणाम होत आहे. अशा परिस्थितीत तुम्ही चांगल्या ठिकाणी गुंतवणूक करावी, जिथे परतावा मिळण्याची शक्यता खूप जास्त असते. आज आम्ही तुम्हाला सरकारच्या एका अतिशय चांगल्या योजनेबद्दल सांगणार आहोत. विशेषतः मुलींचे भविष्य सुरक्षित करण्यासाठी ही योजना सुरू करण्यात आली आहे. ‘सुकन्या समृद्धी योजना’ (Sukanya Samriddhi Yojana) असं या योजनेचं नाव आहे. तुमच्या बचतीचे पैसे येथे गुंतवून तुम्ही तुमच्या मुलींचं आर्थिक भविष्य सुरक्षित करू शकता. चला, आज आपण सुकन्या समृद्धी योजनेबद्दल माहिती घेऊया. सुकन्या समृद्धी योजनेत गुंतवणूक करण्याचे अनेक फायदे आहेत, शिवाय गुंतवणूकीसाठी तुमच्याकडे मोठी रक्कम असावी असंही नाही. सुकन्या समृद्धी योजनेत तुम्ही किमान 250 रुपये आणि जास्तीत जास्त 1.5 लाख रुपये जमा करू शकता. सुकन्या समृद्धी योजनेत गुंतवणूक करून तुम्हाला आयकर कलम 80C अंतर्गत सूटही मिळते. त्यामुळं ही गुंतवणूक निश्चितच फायदेशीर ठरू शकते. हेही वाचा: तुम्हाला अजूनही ITR परतावा मिळालेला नाही? विलंबामागं असू शकतात ‘ही’ 3 कारणं सध्या सुकन्या समृद्धी योजनेत गुंतवणूक केल्यास 7.6 टक्के व्याजदेखील मिळतं. या योजनेत गुंतवणूक केल्यास काही वर्षांच्या कालावधीत तुमचे पैसे दुप्पट होतात. सुकन्या समृद्धी योजनेत खातं उघडण्याची प्रक्रिया अगदी सोपी आहे. यासाठी मुलीच्या पालकांना जवळच्या पोस्ट ऑफिस किंवा बँकेच्या शाखेत जावं लागेल. येथे तुम्हाला अर्जाचा फॉर्म मिळेल.
या अर्जामध्ये, तुम्हाला तुमची सर्व आवश्यक माहिती काळजीपूर्वक प्रविष्ट करावी लागेल. यानंतर, तुमची सर्व आवश्यक कागदपत्रे या फॉर्मसोबत संलग्न करा आणि पोस्ट ऑफिस किंवा बँक शाखेत सबमिट करा. या सोप्या प्रक्रियेचं अनुसरण करून, तुम्ही सुकन्या समृद्धी योजनेमध्ये तुमचे खाते सहज उघडू शकता.