कोरोना लॉकडाऊनमध्ये जन्मलेल्या मुलांचा शास्त्रज्ञांनी अभ्यास केला आहे आणि त्यातून शास्त्रज्ञांनी असा दावा केला आहे.
गर्भातील बाळाला कोरोना झाल्याची प्रकरणं जगात क्वचितच आढळून आली आहे. मात्र यादरम्यान जन्मलेल्या मुलांना भविष्यात आरोग्याचा धोका आहे, असं शास्त्रज्ञांनी म्हटलं आहे.
आयर्लंडमधील रॉटूंडा हॉस्पिटलमध्ये मार्च ते मे 2020 दरम्यान जन्मलेल्या एक हजार मुलांचा अभ्यास करण्यात आला आहे. यादरम्यान कोरोना लॉकडाऊन लागू होता.
लंडनच्या रॉयल कॉलेज ऑफ सर्जन्समधील बालरोग विभागातील तज्ज्ञांच्या मते, जेव्हा या मुलांचा जन्म झाला तेव्हा जगभरात सोशल डिस्टन्सिंगचं पालन होत होतं. लोकांना आयसोलेशनमध्ये पाठवलं जात होतं. स्वच्छतेची अधिक काळजी घेतली जात होती. त्यावेळी प्रदूषणही कमी झालं होते.
आरसीएसआय युनिव्हर्सिटी ऑफ मेडिसीन अँड हेल्थ सायन्सेजच्या पीडियाट्रिक विभागाचे प्रो. जोनाथन हॉरीहेन यांनी सांगितलं, लॉकडाऊनमध्ये जन्मलेल्या बाळांच्या शरीराने सद्यपरिस्थितीशी स्वत:ला जुळवून घेण्याचा प्रयत्न केला. यादरम्यान भविष्यासाठी ते तयार झाले नाहीत.
तज्ज्ञांनी सांगितलं, लॉकडाऊनमध्ये जन्म झालेल्या मुलांना श्वास आणि इतर संक्रमणाची समस्या झाली नाही. त्यामुळे पुढे जाऊन त्यांचा त्रास वाढू शकतो. अधिक स्वच्छता आणि कमी प्रदूषणामुळे भविष्यात ही मुलं पुन्हा सर्व या परिस्थितीला सामोरं जातील तेव्हा त्यांच्या शरीरासाठी हे सर्व नवीन असेल.
सामान्यपणे मुलं जमिनीवर खेळतात, अस्वच्छही होतात, अनेक लोकांच्या संपर्कात येतात, कित्येक विषाणूंच्याही संपर्कात येतात. यामुळे त्यांची रोगप्रतिकारक शक्ती अधिक मजबूत होते. स्वच्छता आणि कीटाणूविरहित वातावरणामुळे त्यांच्या शरीराची कार्य करण्याची क्षमता कमजोर होत आहे. अशा परिस्थितीतील व्यक्तीला अ‍ॅलर्जीसारखी समस्या उद्भवत आहे.
सध्या अ‍ॅलर्जीसारखी प्रकरणं वाढत आहे आणि याचं प्रमुख कारण म्हणजे शरीर त्यावर मात करण्यासाठी तयार होत नाही आहे आणि कोरोना लॉकडाऊनमध्ये जन्मलेल्या बाळांनाही भविष्यात अ‍ॅलर्जीचीही समस्या अधिक उद्भवू शकते, असं शास्त्रज्ञांनी सांगितलं.