दिल्लीत (Delhi) गेल्या 24 तासांपासून सलग सुरू असलेल्या पावसाने (Heavy rains) आता जनजीवन ठप्प व्हायला सुरुवात झाली आहे. हवामान खात्याने (IMD) व्यक्त केलेल्या अंदाजानुसार आणखी दोन ते तीन वेळा मुसळधार पावसाच्या सरी कोसळण्याची शक्यता आहे.
गेल्या 48 तासांपासून दिल्लीत जोरदार पाऊस सुरू आहे. पुढील 24 तासांतदेखील पावसाचा जोर कायम राहण्याचा अंदाज हवामान विभागाने व्यक्त केला आहे.
हवामान विभागाने दिलेल्या माहितीनुसार दिल्लीत गेल्या 27 तासात 11.2 सेमी पावसाची नोंद झाली आहे. सप्टेंबर महिन्यात पडलेल्या पावसाचा विचार करता गेल्या 19 वर्षातील हा सर्वाधिक पाऊस असल्याचं सांगण्यात आलं आहे.
दिल्लीतील अनेक भागात झाडं उन्मळून पडण्याच्या घटना घडल्या असून काही ठिकाणी किरकोळ अपघातांचीदेखील नोंद करण्यात आली आहे.
या पावसाचा सर्वाधिक फटका नोएडा आणि गाजियाबाद भागाला बसला आहे. या भागात अनेक ठिकाणी पाणी साचलं असून वाहतूक ठप्प झाली आहे.
दिल्लीच्या ग्रामीण भागात यामुळे मोठा परिणाम झाला असून अनेक गावांमध्ये गेल्या अनेक तासांपासून वीज गायब आहे.