मुंबई, 28 जुलै : मुंबई घड्याळाच्या काट्यावर चालते असं म्हणतात. मात्र याच मुंबईचा वेग मंदावण्याची शक्यता आहे. मुंबईच्या लोकल ट्रेनची ओळख लोकांची लाईफ लाईन म्हणून केली जाते. मात्र वाहतुकीसाठी त्यानंतर टॅक्सीचा मुंबईत खुप मोठा रोल आहे. मुंबईतील सर्वात मोठ्या युनियनने 1 ऑगस्टपासून संपावर जाण्याची घोषणा केली आहे. सरकार भाडेवाढीबाबत कोणताही निर्णय घेत नसल्याच्या निषेधार्थ मुंबई टॅक्सीमन युनियनने 1 ऑगस्ट रोजी टॅक्सी संपाची हाक दिली आहे. युनियनने सरकारकडे टॅक्सी भाड्यामध्ये 10 रुपये वाढ करण्याची मागणी केली आहे. म्हणजेच किमान भाडे 25 रुपयांवरून 35 रुपये करण्याची मागणी करण्यात आली आहे. टाईम्स ऑफ इंडियाच्या अहवालानुसार, मुंबईतील काही ऑटोरिक्षा संघटनांनी असेही म्हटले आहे की ते 31 जुलैपर्यंत सरकारच्या भाडेवाढीची वाट पाहतील, जर त्यात यश आलं नाही तर तर ते टॅक्सी संपाला देखील पाठिंबा देऊ शकतात. ऑटो युनियन किमान भाड्यात 3 रुपये वाढीची अपेक्षा करत आहेत. म्हणजेच सरकारने किमान भाडे 21 रुपयांवरून 24 रुपये करावे, अशी त्यांची मागणी आहे. मुंबई मेट्रोपॉलिटन रिजन ट्रान्सपोर्ट अथॉरिटी या आठवड्यात ऑटोच्या भाड्यात वाढ करायची की नाही यावर निर्णय घेण्याची शक्यता आहे, अशी माहिती सूत्रांकडून मिळत आहे. TOI शी बोलताना टॅक्सी युनियनचे नेते एएल क्वाड्रोस म्हणाले की, भाडे वाढवण्याची खूप गरज आहे कारण 2021 मध्ये शेवटच्या भाडे सुधारणानंतर सीएनजीचा दर 48 रुपयांवरून 80 रुपयांपर्यंत वाढला आहे." सरकारला शिफारस करण्यात आली होती की मागील भाडे सुधारणेनंतर सीएनजी 25% पेक्षा जास्त वाढल्यास, टॅक्सीचे भाडे त्वरित सुधारित केले जावे. भाडे वाढवण्याची आमची मागणी रास्त आहे. इंधन दरात वाढ आणि टॅक्सीच्या मेंटनन्स खर्चामुळे टॅक्सी चालकांना दररोज 300 रुपयांचा तोटा सहन करावा लागतो. त्याचबरोबर क्वाड्रोस यांनी वाहतूक पोलिसांकडून आकारण्यात येणाऱ्या भरमसाठ दंडालाही विरोध केला. त्यांनी मागणी केली की, आमचे चालक दिवसभराच्या कमाईपेक्षा जास्त दंड भरतात. यातील बहुतांश दंड नो-पार्किंग झोनमधील पार्किंगसाठी वसूल केला जातो. आमच्या चालकांना ई-चलान पाठवण्याऐवजी सरकारने आम्हाला पार्किंगसाठी अधिक स्टँडचे वाटप करावे, अशी मागणी क्वाड्रोस यांनी केली. शशांक राव यांच्या नेतृत्वाखालील मुंबई ऑटोरिक्षामेन्स युनियनने अलीकडे TOI ला सांगितले होते की, त्यांच्या युनियनने सरकारला CNG दर कमी करून भाडेवाढ टाळण्याची सूचना केली होती. सरकारने महानगर गॅस लिमिटेडला सीएनजीच्या किमतीत वाढ मागे घेण्यासाठी राजी करावे,“असे ते म्हणाले. इंधनाचे दर कमी झाल्यास भाडे वाढवण्याची गरज भासणार नाही.