भारताची भागीदारी असलेली ऑक्सफर्डची कोरोना लस (oxford corona vaccine) आणि प्लाझ्मा थेरेपी (Plasma Therapy) ही दोन आशेची किरणं होती. मात्र त्यांच्या परिणामांबाबत वाईट अशी बातमी समोर आली आहे.
ऑक्सफर्डच्या कोरोना लशीच्या पहिल्या आणि दुसऱ्या टप्प्यातील मानवी चाचण्या यशस्वी झाल्या आणि तिसऱ्या टप्प्यातील चाचणी सुरू झाल्याने अनेकांच्या आशा पल्लवित झाल्या होत्या.
तर दुसरीकडे कोरोनामुक्त झालेल्या रुग्णांच्या शरीरातील प्लाझ्मा कोरोनाग्रस्त व्यक्तीला देऊन प्लाझ्मा थेरेपी माध्यमातून रुग्णांना लवकरात लवकर बरं करण्यासाठी आणि मृत्यूदर कमी करण्यासाठी प्रयत्न सुरू होते.
मात्र आता ऑक्सफर्डची कोरोना लस आणि प्लाझ्मा थेरेपी या दोघांबाबतही एकाच दिवशी दोन वाईट बातम्या आल्या आहेत. कोरोनाव्हायरस विरुद्ध सुरू असलेल्या लढ्याला मोठा झटका बसला आहे.
ऑक्सफर्ड कोरोना लशीच्या तिसऱ्या टप्यातल्या चाचण्या सुरू असतानाच एका व्यक्तीची प्रकृती बिघडली होती. त्यामुळे ब्रिटनमध्ये या लशीचं ट्रायल तात्पुरत थांबवण्यात आलं आहे.
अ‍ॅस्ट्रॅजेनेका (AstraZeneca), ऑक्सफोर्ड युनिव्हर्सिटी (Oxford university) ने तयार केलेली ही लस. ज्यामध्ये पुण्यातील सीरम इन्स्टिट्युटचीही भागीदारी आहे. भारतातही या लशीचं ट्रायल सुरू आहे.
दरम्यान दुसरीकडे भारतात सुरू असलेल्या प्लाझ्मा थेरेपीच्या ट्रायलबाबत इंडियन मेडिकल काऊन्सिल ऑफ रिसर्चने माहिती दिली आहे.
22 एप्रिल ते 14 जुलैदरम्यान भारताच्या 39 सरकारी आणि खासगी रुग्णालयात 464 रुग्णांवर हा रिसर्च करण्यात आला. 235 रुग्णांंना प्लाझ्मा थेरेपी देण्यात आली. 229 रुग्णांना सामान्यपणे जे उपचार दिले जात आहेत ते उपचार देण्यात आलेत.
प्लाझ्मा दिलेल्या रुग्णांना सामान्य उपचार दिलेल्या रुग्णांच्या तुलनेत बरं होण्यासाठी 24 तास म्हणजे एक दिवस जास्त लागत असल्याचं दिसून आलं. प्लाझ्मा थेरेपीमुळे कोरोना संक्रमितांचा मृत्यूचा दर कमी होत नाही, असं आयसीएमआरने स्पष्ट केलं आहे.