सध्या आरोग्य कर्मचारी आणि फ्रंटलाइन वर्कर्सचं लसीकरण सुरू आहे. मार्चमध्ये ज्येष्ठ नागरिकांचंही लसीकरण सुरू होण्याची शक्यता आहे.
भारतात 16 जानेवारी, 2021 पासून कोरोना लसीकरण सुरू झालं आहे. सरकारनं लसीकरणासाठी प्राधान्यक्रम ठरवला आहे. सुरुवातीला आरोग्य कर्मचारी, मग फ्रंटलाइन वर्कर्स आणि त्यानंतर वयस्कर व्यक्तींना लस दिली जाणार आहे.
जानेवारीत आरोग्य कर्मचाऱ्यांचं आणि फेब्रुवारीत फ्रंटलाइन वर्कर्सचं लसीकरण सुरू झालं. त्यांना लशीचा पहिला डोस मिळाला आहे. 13 फेब्रुवारीपासून दुसरा डोस दिला जाणार आहे.
पण या कालावधीत ज्या आरोग्य कर्मचाऱ्यांना किंवा फ्रंटलाइन वर्कर्सना कोरोना लशीचा पहिलाच डोस मिळाला नाही त्यांचं काय असा प्रश्न उपस्थित होतो.
यासाठी केंद्र सरकारनं सर्व राज्यं आणि केंद्रशासित प्रदेशांना mop-up vaccine sessions सुरू करण्यास सांगितलं आहे. यामध्ये ज्या आरोग्य कर्मचाऱ्यांना आणि फ्रंटलाइन वर्कर्सना कोरोना लस मिळाली ना, त्यांना लस दिली जाणार आहे. नव्या तारखा जाहीर करण्यात आल्या आहेत.
24 फेब्रुवारीपर्यंत आरोग्य कर्मचाऱ्यांना आणि 6 मार्चपर्यंत फ्रंटलाइन वर्कर्सना मॉप अप राऊंड अंतर्गत कोरोनाचा पहिला डोस घेता येऊ शकतो.
प्राधान्य गटातील सर्वांना लस मिळावी यासाठी राज्ये त्यांच्या सोयीनुसार अधिकाधिक मॉप अप राऊंड्स घेऊ शकतातही असंही केंद्रानं सांगितलं.
मार्चपासून तिसऱ्या टप्प्यातील लोकांचं लसीकरण सुरू होण्याची शक्यता आहे. यामध्ये 50 पेक्षा अधिक वयाच्या व्यक्ती आणि मधुमेह, हायपरटेन्शन असे इतर आजार असलेल्या व्यक्तींचा समावेश आहे.