मुंबई, 07 जानेवारी : मराठी इंडस्ट्रीत सध्या चर्चेतलं नाव आहे ते म्हणजे अभिनेत्री प्राजक्ता माळी. प्राजक्ताचे तिच्या मालिका,सिनेमातील भूमिकांमुळे असंख्य चाहते आहेतच शिवाय सोशल मीडियावरही तिचं मोठं फॅन फॉलोइंग आहे. नुकताच प्राजक्ता माळीने एक नवीन उपक्रम हाती घेतला आहे. प्राजक्ता माळीने नवीन ज्वेलरी ब्रॅंड सुरु केला आहे. ‘प्राजक्तराज’ असं या ब्रॅंडचं नाव असून मनसे अध्यक्ष राज ठाकरे यांच्या हस्ते या ब्रॅंडचं अनावरण मुंबईत करण्यात आलं. यावेळी राज ठाकरे यांच्या पत्नी शर्मिला ठाकरे यादेखील उपस्थित होत्या. कोणत्या दागिन्यांचा आहे समावेश? प्राजक्ताने आपल्या या ‘प्राजक्तराज’ या ज्वेलरी ब्रॅंडच्या माध्यमातून इतिहासकालीन दागिने पुन्हा एकदा नव्याने प्रेक्षकांसमोर आणले आहेत. या ब्रॅंडमध्ये वर्षानुवर्षे चालत आलेले पारंपरिक दागिने म्हणजे सारा, बुगडी, शिंदेशाही तोडे, पैलू पाटली, मासोळ्या, बेलपान, बकुळीहार, पुतळीहार, साज, ठुशी, नथ, मोहनमाळ, चंद्रहार यासारखे अनेक दागिने मिळणार आहेत, असं प्राजक्ता माळी हिने सांगितले.
मुख्य म्हणजे हे दागिने खरे नसून ते ऑथेंटिक असणार आहेत. म्हणजेच दुसऱ्या धातूवर सोन्याचं पाणी चढवलेले हे दागिने असणार आहेत. लग्नसमारंभासाठी किंवा सणावारासाठी परिधान करायचे महाराष्ट्राच्या मातीतले हे दागिने प्राजक्ताने आपल्या ब्रॅंडच्या रूपाने समोर आणले आहेत. या दागिन्यांच्या सोन्या, चांदी आणि तांब्याच्या दागिन्यांच्या शृंखलेची नावं आहेत तुळजा, म्हाळसा आणि सोनसळा. आधुनिक काळात बदलत गेलेल्या परंपरेनुसार मागे पडलेल्या दागिन्यांचा ब्रॅंड सुरू करण्यामागचं कारणही तिने या कार्यक्रमात सांगितले. भावाच्या लग्नात इच्छा असूनही आपल्याला पारंपरिक दागिने परिधान करता आले नाहीत. याची खंतही तिने व्यक्त करून दाखवली. यासोबतच पुरुषांसाठीही दागिने प्राजक्तराज लवकरच आणणार आहेत. या दागिन्यांच्या शृंखलेची नावं आहेत शिवबा, बळीबा आणि रायबा असल्याचं प्राजक्ता माळी हिने सांगितले.