मुंबई, 16 फेब्रुवारी : देशभरात कोरोनाची रुग्णसंख्या (Corona Patients) कमी होत असल्याचं चित्र दिसत आहे. त्याच वेळी महाराष्ट्रात मात्र कोरोनाबाधितांची संख्या वाढत असल्याचं दिसत आहे. विशेषत: मुंबईत (mumbai coronavirus) रुग्णसंख्या पुन्हा वाढते आहे. मुंबईत 14 फेब्रुवारीला महिनाभरानंतर पहिल्यांदाच सहाशेहून अधिक नव्या रुग्णांची नोंद झाली आहे. त्यामुळे मुंबईत आता पुन्हा कोरोनाचा उद्रेक होण्याची आणि लॉकडाऊन लागण्याची शक्यता आहे मुंबईत आतापर्यंत एकूण तीन लाख 14 हजार 569 कोरोनाबाधितांची नोंद झाली आहे. अॅक्टिव्ह म्हणजेच रुग्णालयात दाखल (Active Patient) असलेल्या मुंबईतल्या कोरोनाबाधितांची 15 फेब्रुवारीपर्यंतची संख्या 5531 एवढी आहे. हिंदुस्तान टाइम्स च्या वृत्तानुसार मुंबई जिल्ह्याचा रुग्ण बरे होण्याचा दर 94 टक्के असून, नवे रुग्ण दुप्पट होण्याचा कालावधी 455 दिवस झाला असल्याची माहिती बीएमसीनं दिली आहे. मुंबई जिल्ह्यात 85 कंटेन्मेंट झोन (Containment Zone) असून, एकूण 992 इमारती सील करण्यात आल्या आहेत. हे वाचा - मुंबईत नव्या कोरोना रुग्णांची वाढ; ‘या’ परिसरात पुन्हा लॉकडाउनची शक्यता याआधी धारावीला कोरोनानं आपल्या विळख्यात घेतलं होतं. आता कोरोनाचे नवे हॉटस्पॉट समोर आले आहेत. 14 फेब्रुवारीच्या आकडेवारीनुसार मुंबईतील कोरोनाचे नवे हॉटस्पॉट खालीलप्रमाणे आहेत. मुंबईतील कोरोनाचे हॉटस्पॉट 1) महाराष्ट्र सरकारच्या आकडेवारीनुसार, मुंबईतल्या अॅक्टिव्ह रुग्णांची सर्वाधिक संख्या बोरीवलीत असून, ती 408 आहे. तसंच, मुंबईतल्या कोरोनाबाधितांचे आतापर्यंतचे सर्वाधिक मृत्यू बोरीवलीतच नोंदवले गेले असून, त्यांची संख्या 643 एवढी आहे. 2) बोरीवलीनंतर केडब्ल्यू वॉर्डचा क्रमांक लागतो. यात अंधेरी पश्चिम, जोगेश्वरी पश्चिम आणि विलेपार्ले पश्चिम या परिसरांचा समावेश आहे. या परिसरातल्या अॅक्टिव्ह कोरोनाबाधितांची संख्या 378 असून, येथे आतापर्यंत 573 मृत्यूंची नोंद झाली आहे. संक्रमण रोखण्यासाठी रविवारी (14 फेब्रुवारी) या परिसरातल्या 100 इमारती सील करण्यात आल्या. 3) कांदिवली आणि चारकोपमध्ये 345 कोरोनाबाधितांवर सध्या उपचार सुरू आहेत. तसंच आतापर्यंत 552 जणांचा मृत्यू झाला आहे. 4) पी-नॉर्थ वॉर्डमधील मालाड, मनोरी, मारवे, अक्सा, मढ या परिसरात 338 कोरोनाबाधितांवर सध्या उपचार सुरू आहेत. हे वाचा - मुंबईत नव्या कोरोना रुग्णांची वाढ; ‘या’ परिसरात पुन्हा लॉकडाउनची शक्यता 5) मुलुंडमध्ये सध्या 292 कोरोनाबाधित उपचार घेत असून, आतापर्यंत 370 मृत्यूंची नोंद झाली आहे. सील केलेल्या इमारतींची सर्वाधिक संख्याही मुलुंडमध्ये आहे. रविवारपर्यंत इथल्या सील केलेल्या इमारतींची संख्या 202वर पोहोचली होती. या वॉर्डमध्ये नवे रुग्ण वाढण्याचा दर 0.25 टक्के आहे. 6) एन वॉर्डमधल्या घाटकोपर, विद्याविहार आणि पंतनगरमध्ये 162 इमारती सील करण्यात आल्या आहेत. वॉर्डमधल्या 14 झोपडपट्ट्या आणि चाळींमध्ये कन्टेनमेंट झोन तयार करण्यात आले आहेत. या वॉर्डमध्ये 281 रुग्णांवर उपचार सुरू असून, 594 जणांचा मृत्यू झाला आहे. 7) वॉर्ड एसमधील भांडुप, पवई, कांजूरमार्ग, विक्रोळी, नाहूर येथील 10 झोपडपट्ट्या आणि चाळी कन्टेनमेंट झोनमध्ये आहेत. या वॉर्डमध्ये 281 अॅक्टिव्ह रुग्ण असून, आतापर्यंत 720 जणांचा मृत्यू झाला आहे. 8)‘वॉर्ड एम/वेस्ट’मधील चेंबूर, सिंधी सोसायटी, छेडा नगर आणि टिळकनगर परिसरात रुग्णवाढीचा दर मुंबईत सर्वाधिक आहे.