साध्या सायकलीचं केलं इ-सायकलमध्ये रुपांतर
'सायकल चालवा आणि प्रदूषण वाचवा', असा संदेश सायकलिंग करणाऱ्या बहुतांश लोकांकडून दिला जातो.
सध्या कोल्हापुरातील एक गृहस्थ आरोग्यासाठी देखील फायदेशीर अशा साध्या सायलकमध्ये नावीन्य आणत आहेत. ते साध्या सायकलीचं रुपांतर इ-सायकलीमध्ये करतात.
संजय आनंदराव सांगळे असं या 58 वर्षांच्या सायकल प्रेमी गृहस्थांचं नाव आहे.
संजय यांना 2017 साली पहिला हार्ट अटॅक आला होता. या अटॅकनंतर त्यांना एक आश्चर्यकारक गोष्ट समजली.
संजय यांचे ऱ्हदय हे डाव्या बाजूच्या ऐवजी उजव्या बाजूला आहे. त्यामुळे त्यांना विशेष औषोधोपचार करावे लागले.
त्यांनी डॉक्टरांच्या सल्ल्यानुसार सायकल चालवायला सुरुवात केली. सायकल चालवायला सुरूवात केल्यानंतर माझ्या गोळ्या हळू-हळू बंद झाल्या.
माझी तब्येत देखील सुधारू लागली, अशी माहिती संजय यांनी दिली आहे.
काय आहे खासियत?
सायकलिंगची आवड लागलेल्या संजय यांनी स्वत:च्याच सायकलीला इलेक्ट्रिक बनवण्याचे प्रयत्न सुरू केले.
त्यांनी त्यांच्या सायकलीला हेडलाईट, ब्रेकलाईट, एफएम रेडिओ, मोबाईल चार्जिंग सॉकेट, इंडिकेटर, हॉर्न अशा बऱ्याच गोष्टी बसवल्या.
सिक्युरिटी गार्डची नोकरी करतच त्यांनी त्यांच्या आवडीमुळे आजवर 30 ते 35 सायकलीचे इ सायकल्समध्ये रुपांतर करुन दिले आहे.
स्वतःची सायकल त्यांच्याकडे घेऊन गेल्यावर संजय किमान 18 हजार रुपयांमध्ये त्यामध्ये इ-सायकलच्या सर्व सुविधा उपलब्ध करुन देतात.
त्यांचं सध्या सायकल फिरतानाच ऑटोमॅटीक चार्ज होणारी बॅटरी सायकलीला बसवण्याचं काम सुरू आहे.
हा प्रयोग यशस्वी झाल्यानंतर बॅटरी काढून घरी चार्ज करावी लागणार नाही, असं संजय यांनी सांगितलं.