सिल्क साड्या घरच्या घरी कशा धुवाल?
सिल्क साड्या वजनाला हलक्या आणि दिसायला देखील खूपच सुंदर असल्याने महिला अनेक सण समारंभाच्या निमित्ताने या साड्या नेसताना दिसतात.
परंतु सिल्कची साडी जर घाण झाली तर ती बाहेरून ड्राय क्लीन करून घेण्यासाठी खूप पैसे खर्च करावे लागतात.
तेव्हा सोप्या टिप्स वापरून सिल्क साडी घरच्या घरी कशी धुवायची हे आज सांगणार आहोत. ज्यामुळे साड्यांची चमक आणि रंग देखील वर्षानुवर्षे टिकून राहील.
सिल्क साडी एकदा नेसल्यानंतर लगेच धुवू नये, तर ती जवळपास चार ते पाच वेळा घातल्यानंतर धुणे चांगले राहील.
जेव्हा सिल्क साडी धुण्याचा विचार कराल तेव्हा सर्वप्रथम त्यावरील लेबल वाचा.
डिटर्जंटने सिल्क साडी धुतल्यास ती खराब होऊ शकते.
गरम पाण्याने साडी धुतल्याने साडीची चमक आणि कलर फेड होऊ शकतो. म्हणून साड्या धुण्यासाठी थंड पाणी वापरा.
साडी धुण्याच्या काहीवेळा पूर्वी ती साडी थंड पाण्यात भिजवून ठेवा.
साडी पाण्यात भिजवल्यानंतर एक बादली स्वच्छ पाणी घ्या आणि त्यात दोन चमचे पांढरे व्हिनेगर मिसळा.
त्यानंतर सिल्कची साडी त्यात भिजवून साधारण दहा मिनिटे तशीच राहू द्या.
नंतर ती पुन्हा स्वच्छ पाण्याने धुवा, अशा प्रकारे साडीवरील डाग दूर होण्यास मदत होईल.
सिल्कच्या साड्या धुतल्यानंतर खूप जोरात पिळून घेऊ नका आणि काही वेळ अशीच ठेवा, जेणेकरून त्यातील पाणी निघून जाईल.
काहीवेळाने साडी सावलीत सुकवण्यासाठी ठेवा त्यावेळी साडीवर कडक सूर्यप्रकाश पडणार नाही याची काळजी घ्या.
कारण सूर्यप्रकाशामुळे साडीची चमक कमी होण्याची भीती असते.
सिल्कच्या साड्या नेहमी वेगळ्या जागी ठेवा आणि सुती कापडाने चांगल्या झाकून ठेवा. जेणेकरून साडी वर्षानुवर्षे सुरक्षित राहील.