गुढीपाडव्याला गुढी उभारण्याची परंपरा आहे. गुढी कशी उभारावी याविषयी जाणून घेऊ.

गुढीसाठी उंच बांबू किंवा काठी घ्यावी. स्वच्छ धुऊन त्या काठीच्या वरच्या भागाला रेशमी वस्त्र किंवा साडी गुंडाळावी.

काठीला कडुलिंबाची डहाळी, आंब्याची पाने, फुलांचा हार, साखर वड्यांची माळ बांधून त्यावर तांबा, पितळ, किंवा चांदीचा तांब्या किंवा फुलपात्र बसवावे.

ज्या भागात (दारात/गॅलरी) गुढी उभारायची आहे तिथली जागा स्वच्छ करून धुऊन पुसून घ्यावी.

गुढी उभारण्याच्या जागेवर रांगोळी काढून पाट ठेवून त्यावर गुढीची काठी ठेवावी.

गुढीकाठी ही दारात किंवा उंच गच्चीवर किंवा गॅलरीत अर्थात उंच जागेवर लावाण्याची पद्धत असते.

गुढीची काठी नीट बांधून काठीला गंध, फुले, अक्षता वाहून गुढीची पूजा करावी.

निरांजन लावून उदबत्ती ओवाळावी. दूध-साखर, पेढ्यांचा नैवेद्य दाखवावा.

दुपारी गुढीला गोडधोडाचे नैवेद्य दाखवावे. या दिवशी परंपरेनुसार श्रीखंड-पुरी किंवा पुरणपोळीचा बेत असतो.

संध्याकाळी सूर्यास्ताच्या वेळीस परत हळद-कुंकू, फुले, अक्षता, वाहून गुढी उतरविली जाते.

 ह्या दिवशी आप्तेष्टांना नववर्षाचे अभीष्टचिंतन देखील केले जाते.

(सूचना : येथे दिलेली माहिती धार्मिक श्रद्धेवर आधारित आहे. न्यूज 18 लोकमत त्याची हमी देत नाही.)