क्रीडा मंत्रालयाची कुस्ती महासंघावर मोठी कारवाई! कुस्तीपटूंवर आरोप करणारे सहायक सचिव निलंबित

नवी दिल्ली, 21 जानेवारी : जगभरात देशाची मान उंचवणाऱ्या कुस्तीपटूंनी दिल्लीतील जंतर-मंतर येथे आंदोलन केलं. विनेश फोगाट हीने भारतीय कुस्ती महासंघाचे अध्यक्ष बृजभूषण सिंह यांच्यावर महिला खेळाडूंचे लैंगिक शोषण केल्याचा आरोप केला. तसेच प्रशिक्षकही महिला खेळाडूंचे लैंगिक शोषण करतात, असा आरोपही तिने केला. यानंतर देशभर खळबळ उडाली. याची क्रिडा मंत्रालयाने गंभीर दखल घेतली आहे. मंत्रालयाने कुस्ती महासंघाचे सहाय्यक सचिव विनोद तोमर यांना निलंबित केले आहे. तोमर यांनी ब्रिजभूषण सिंग यांचं समर्थन करत धरणे धरणाऱ्या कुस्तीपटूंच्या हेतूवर प्रश्न उपस्थित केल्याने त्यांच्यावर ही कारवाई करण्यात आली.

कुस्ती महासंघाचे अध्यक्ष ब्रिजभूषण शरण सिंह यांचा बचाव करताना विनोद तोमर यांनी आपल्यावर लावलेले आरोप निराधार असल्याचे म्हटले आहे. एएनआय या वृत्तसंस्थेशी बोलताना तोमर म्हणाले की, दिल्लीच्या जंतरमंतरवर धरणे धरणाऱ्या कुस्तीपटूंनी लैंगिक छळ आणि आर्थिक अनियमिततेच्या आरोपांसाठी WFI अध्यक्षांविरुद्ध कोणतेही पुरावे सादर केलेले नाहीत.

वाचा - भारतीय क्रीडा विश्वाला याआधीही लैंगिक छळाच्या प्रकरणाने हादरा, अशी झाली होती कारवाई

तोमर म्हणाले होते, 'आरोप निराधार आहेत. तीन-चार दिवस झाले (कुस्तीपटू धरणावर बसले आहेत) आणि त्यांनी अद्याप कोणताही पुरावा सादर केलेला नाही. मी गेल्या 12 वर्षांपासून त्याच्याशी निगडीत आहे आणि मी अशी कोणतीही घटना किंवा आरोप पाहिलेले नाही. ते म्हणाले की, केंद्रीय क्रीडा मंत्रालयाकडून त्यांच्याविरुद्धची चौकशी प्रलंबित असताना WFI अध्यक्षांनी पद सोडले आहे.

तोमर म्हणाले, 'त्यांच्याविरुद्ध सुरू असलेला तपास पूर्ण होईपर्यंत ते आपल्या पदावरून पायउतार झाले आहेत. त्यांनी राजीनामा दिलेला नाही. मात्र, डब्ल्यूएफआयच्या दैनंदिन कामकाजापासून स्वतःला दूर केले आहे. WFI प्रमुख आणि इतर वरीष्ठ अधिकार्‍यांविरुद्धच्या त्यांच्या तक्रारींचे निवारण केले जाईल अशी सरकारकडून कारवाईची हमी मिळाल्यानंतर भारतीय कुस्तीपटूंनी शुक्रवारी रात्री उशिरा आपला आंदोलन मागे घेतले आहे.

केंद्रीय क्रीडा मंत्री अनुराग ठाकूर यांनी रात्री उशिरापर्यंत धरणावर बसलेल्या स्टार कुस्तीपटूंशी चर्चा केल्यानंतर ऑलिम्पियन एमसी मेरी कोम यांच्या अध्यक्षतेखालील सात सदस्यीय 'निरीक्षण समिती' ब्रिजभूषण शरण सिंग यांच्यावरील आरोपांची चौकशी पूर्ण करणार नाही, असे जाहीर केले. तोपर्यंत ब्रिजभूषण WFI च्या दैनंदिन व्यवहारांपासून दूर राहतील. चौकशी समितीला अहवाल सादर करण्यासाठी चार आठवड्यांची मुदत देण्यात आल्याचे क्रीडामंत्र्यांनी सांगितले होते.