आयपीएल 2021 : रवींद्र जाडेजाच्या `या` कृतीमुळे फॅन्सनी केलं त्याचं कौतुक

1. नवी दिल्ली, 28 सप्टेंबर: आयपीएल 2021च्या (IPL 2021) दुसऱ्या टप्प्यात चेन्नई सुपर किंग्ज टीमची (CSK) विजयी घोडदौड सुरूच आहे. धोनीची ही टीम 3 मॅच जिंकून पॉइंट टेबलमध्ये अव्वल स्थानावर पोहोचली आहे. प्रत्येक मॅचमध्ये एक नवा खेळाडू विनर म्हणून उदयास येताना दिसत आहे. पहिल्या मॅचमध्ये ऋतुराज गायकवाड आणि ड्वेन ब्रावोनं टीमला विजय मिळवून दिला. दुसऱ्या मॅचमध्ये पहिल्या चार बॅट्समननी चांगली खेळी करून टीमला विजय मिळवून दिला, तर रविवारी झालेल्या कोलकाता नाइट रायडर्सविरुद्धच्या मॅचमध्ये रवींद्र जडेजा (Ravindra Jadeja) हिरो ठरला. त्यानं प्रसिद्ध कृष्णाच्या ओव्हरमध्ये 5 बॉल्समध्ये 21 रन्स काढले आणि चेन्नई टीमला विजय मिळवून दिला. बॅटिंगसह त्याने बॉलिंगमध्येही कमाल केली. 4 ओव्हर्समध्ये 20 रन्स देऊन 1 विकेट मिळवली. या कामगिरीमुळे रवींद्र जडेजाला `मॅन ऑफ द मॅच` घोषित करण्यात आलं.

CSK च्या विजयानंतर विजयाचा शिल्पकार ठरलेल्या रवींद्र जडेजानं मॅचनंतर जे केलं ते त्याच्या फॅन्सना भलतंच आवडलं. रविवारी जागतिक कन्या दिन (World Daughter Day) होता.

या पार्श्वभूमीवर धोनीच्या टीममधल्या या खेळाडूनं आपलं `मॅन ऑफ द मॅच` हे अॅवॉर्ड त्याच्या मुलीला समर्पित केलं. याबाबतची छायाचित्रं सीएसकेनं त्यांच्या अधिकृत ट्विटर हँडलवरून शेअर केली. या छायाचित्रांमध्ये जडेजा त्याची मुलगी निध्यानासोबत उभा असल्याचं दिसत आहे. परंतु, या दोघांमध्ये काचेचं दार आहे. या छायाचित्राखाली एक हृदयस्पर्शी कॅप्शन देण्यात आली आहे. त्यात लिहिलं होतं, की `हे तुझ्यासाठी निध्याना.` जडेजानं 19व्या ओव्हरमध्ये प्रसिद्ध कृष्णाला 2 फोर आणि 2 सिक्सर्स मारत 21 रन्स काढले (ओव्हरमध्ये 22 रन्स) आणि तिथूनच मॅच पालटली.

जडेजानं `मॅन ऑफ दी मॅच अॅवॉर्ड` जिंकल्यानंतर बोलताना सांगितलं, की `हे मुश्किल आहे. तुम्ही 5 महिन्यांपासून टेस्ट क्रिकेट खेळत असाल आणि अचानक तुम्हाला मर्यादित क्रिकेट खेळावं लागत असेल तर हे खरोखरच अवघड आहे. नेट्समध्ये मी बॅटिंग करत होतो. त्यामुळे मी जे काही नेट्समध्ये केलं आहे, तेच मॅचमध्ये करण्याचा प्रयत्न करील, असा विचार करत होतो. शेवटच्या ओव्हरमध्ये मला जे रन्स मिळाले ते विकेट्सपेक्षा जास्त महत्त्वाचे आहेत. कारण त्यामुळेच आम्ही विजय संपादन करू शकलो.` आयपीएल 2021च्या सीझनमध्ये आतापर्यंत रवींद्र जडेजानं बॅट्समन आणि बॉलर म्हणून चांगली कामगिरी केली आहे. त्याने 10 मॅचेसमध्ये 179 रन्स काढले असून, 7 विकेट्स घेतल्या आहेत.