IND vs NZ : तिसऱ्या टी-20मध्ये सुपर ओव्हरचा थरार, सलग 2 षटकार खेचत हिटमॅनने मिळवून दिला विजय

IND vs NZ : तिसऱ्या टी-20मध्ये सुपर ओव्हरचा थरार, सलग 2 षटकार खेचत हिटमॅनने मिळवून दिला विजय

भारतानं याआधी पहिले दोन सामने जिंकत मालिकेत 2-0ने विजय मिळवला आहे. त्यामुळं ही मालिका खिशात घालण्यासाठी टीम इंडिया सज्ज आहे.

  • Share this:

हेमिल्टन, 29 जानेवारी : भारत-न्यूझीलंड यांच्यात झालेल्या रोमहर्षक सामन्यात भारतानं सुपर ओव्हरमध्ये विजय मिळवला. न्यूझीलंडने सुपर ओव्हरमध्ये 18 धावा केल्यानंतर रोहितनं सलग 2 षटकारांसह भारताला विजय मिळवून दिला. यासह पाच सामन्यांची मालिका भारतानं 3-0ने मालिकाही खिशात घातली. पहिल्यांदाच टीम इंडियानं न्यूझीलंडच्या भुमीवर मालिका जिंकली.

भारत-न्यूझीलंड यांच्यात तिसऱ्या टी-20 सामना अटीतटीचा झाला. भारतानं दिलेल्या 180 धावांच्या आव्हानाचा पाठलाग करताना न्यूझीलंडने 179 धावा केल्या. हा सामना टाय झाल्यामुळं सुपरओव्हरचा थरार पुन्हा पाहायला मिळाला. सुपरओव्हरमध्ये न्यूझीलंडकडून केन विल्यमसन आणि मार्टिन गुप्टिल मैदानात उतरले. 6 चेंडूत या दोघांनी 17 धावा केल्या. त्यामुळं भारताला विजयासाठी 18 धावांची गरज होती. भारताकडून रोहित शर्मा आणि केएल राहुल फलंदाजीसाठी उतरले. पहिल्याच चेंडूवर रनआऊट होण्याची संधी हुकली. तर, दुसऱ्या चेंडूवर सिंगल काढल्यानंतर राहुलनं पुढच्याच चेंडूवर चौकार मारला. सलग दोन चेंडूवर षटकार मारत सामना जिंकवला.

याआधी थरारक सामन्यात मोहम्मद शमीने अखेरच्या षटकात दोन विकेट घेत न्यूझीलंडला धक्का दिला. शेवटच्या ओव्हरमध्ये 9 धावांची गरज असताना शमीने केवळ 8 धावा दिल्या. भारतानं दिलेल्या 180 धावांच्या आव्हानाचा पाठलाग करताना एकट्यानं 48 चेंडूत 95 धावा केल्या. केनने 197.92च्या स्ट्राईक रेटने 8 चौकार आणि 6 षटकारांच्या मदतीनं 95 धावा केल्या, केवळ 5 धावांची केनचे शतक हुकले.

भारतानं दिलेल्या 180 धावांच्या आव्हानाचा पाठलाग करताना मार्टिन गुप्टिल आणि मुनरो यांनी 47 धावांची भागीदारी केली. त्यानंतर रवींद्र जडेजानं 6व्या ओव्हरमध्ये भारताला पहिले यश मिळवून दिले. मार्टिग गुप्टिल 31 धावांवर बाद झाल्यानंतर केन मैदानात आला. न्यूझीलंडचा कर्णधार विल्यमसनने आक्रमक फलंदाजी करत 28 चेंडुंमध्ये अर्धशतक पूर्ण केले. केनने एकट्यानं न्यूझीलंडचा डाव सावरला. भारताकडून रवींद्र जडेजानं 2 विकेट घेत भारताच्या विजयासाठी प्रयत्न केला. थरारक सामन्यात मोहम्मद शमीने अखेरच्या षटकात दोन विकेट घेत न्यूझीलंडला धक्का दिला.

तत्पूर्वी, न्यूझीलंडने प्रथम टॉस जिंकत गोलंदाजीचा निर्णय घेतला. हॅमिल्टनच्या मैदानावर केएल राहुल आणि रोहित शर्मा यांनी दणक्यात सुरुवात केली. चौकार आणि षटकारांच्या जोरावर राहुल आणि रोहित यांनी 89 धावांची भागिदारी केली. पहिल्या दोन सामन्यात अयशस्वी ठरलेल्या रोहित शर्मानं तिसऱ्या सामन्यात कसर पूर्ण केली. रोहितनं 40 चेंडूत 6 चौकार आणि 3 षटकार मारत 65 धावा केल्या. राहुल बाद झाल्यानंतर विराटने फलंदाजीच्या क्रमवारीत बदल करत शिवम दुबेला तिसऱ्या क्रमांकावर फलंदाजीसाठी पाठवले. मात्र शिवमला चांगली कामगिरी करता आली नाही. दुबे केवळ 3 धावा करत बाद झाला. त्यानंतर श्रेयस अय्यर 17 धावा करत बाद झाला. पहिल्या दोन सामन्यात अर्धशतकी खेळी करणारा अय्यर या सामन्यात लवकर बाद झाला. त्यानंतर विराट 38 धावांवर बाज झाल्यानंतर मनिष पांडेने 6 चेंडूत 14 धावा केल्या आणि भारताने 179 धावांपर्यंत मजल मारली. या सामन्यात 68 धावा करत रोहितनं सलामीवीर म्हणून आंतरराष्ट्रीय क्रिकेटमध्ये 10 हजारा धावा पूर्ण केल्या. तर 24 धावा करत विराट टी-20 क्रिकेटमध्ये सर्वात जास्त धावा करणारा कर्णधार ठरला आहे. विराटनं धावा करत धोनीला मागे टाकले.

असा आहे भारतीय संघ : विराट कोहली (कर्णधार), रोहित शर्मा, केएल राहुल (विकेटकीपर), मनीष पांडे, श्रेयस अय्यर, शिवम दुबे, रवींद्र जडेजा, युजवेंद्र चहल, मोहम्मद शमी, जसप्रीत बुमराह, शार्दूल ठाकुर.

असा असेल न्यूजीलंडचा संघ: केन विल्यम्सन (कर्णधार), मार्टिन गुप्टिल, रॉस टेलर, स्कॉट कुगलेइजन, कॉलिन मुनरो, कॉलिन डी ग्रॅंडहोम, टॉम ब्रूस, डेरिल मिशेल, मिशेल सेंटनर, टिम सीफर्ट (विकेटकीपर), हैमिश बेनेट, ईश सोढ़ी, टिम साउथी, ब्लेयर टिकनर.

First published: January 29, 2020, 12:04 PM IST

ताज्या बातम्या