IND vs ENG : कोहलीचं चिडवणं महागात, बेयरस्टो एकटाच पडला टीम इंडियाला भारी!

एजबॅस्टन, 3 जुलै : इंग्लंडचा बॅट्समन जॉनी बेयरस्टो (Jonny Bairstow) यावर्षी जबरदस्त फॉर्ममध्ये आहे. भारताविरुद्धच्या एजबॅस्टन टेस्टच्या पहिल्या इनिंगमध्ये (India vs England 5th Test) बेयरस्टोने शतक ठोकलं. हे त्याचं या वर्षातलं पाचवं आणि लागोपाठ तिसरं शतक आहे. याआधी बेयरस्टोने न्यूझीलंडविरुद्ध नॉटिंघम आणि लीड्समध्येही शतक केलं होतं. बेयरस्टोने शार्दुल ठाकूरच्या (Shardul Thakur) बॉलिंगवर फोर मारत शतक पूर्ण केलं. स्ट्राईक रेटच्या बाबतीत मात्र त्याचं हे शतक मागच्या दोन्ही शतकांपेक्षा संथ होतं. बेयरस्टोने भारताविरुद्धचं त्याचं शतक 119 बॉलमध्ये पूर्ण केलं. बेयरस्टोच्या या खेळीमुळे अडचणीत सापडलेल्या इंग्लंडला सावरायला मदत झाली. त्याने कर्णधार बेन स्टोक्ससोबत पाचव्या विकेटसाठी 75 बॉलमध्ये 66 रनची पार्टनरशीप केली. यानंतर सॅम बिलिंग्स आणि बेयरस्टोमध्येही 50 पेक्षा जास्त रनची पार्टनरशीप झाली. 140 बॉलमध्ये 106 रन करून बेयरस्टो आऊट झाला. बेयरस्टोच्या विकेटनंतर इंग्लंडची बॅटिंग गडगडली आणि त्यांचा 284 रनवर ऑल आऊट झाला, त्यामुळे भारताला 132 रनची आघाडी मिळाली. इंग्लंडची बॅटिंग सुरू असताना 32व्या ओव्हरमध्ये विराट कोहली आणि जॉनी बेयरस्टो यांच्यात बाचाबाची झाली. हा वाद सुरू व्हायच्या आधी बेयरस्टोने 60 बॉलमध्ये 13 रन केले होते, पण नंतर बेयरस्टोने गियरच बदलला. पुढच्या 21 बॉलमध्ये त्याने 37 रन ठोकत अर्धशतक पूर्ण केलं. कोहलीसोबतच्या भांडणानंतर बेयरस्टोने 200 च्या स्ट्राईक रेटने बॅटिंग केली.

The glorious summer of Jonny Bairstow

Scorecard/Clips: https://t.co/jKoipF4U01 #ENGvIND | @IGcom pic.twitter.com/Ycl8Odq8ur — England Cricket (@englandcricket) July 3, 2022

पावसामुळे तिसऱ्या दिवसाचा लंच लवकर घेतला गेला तेव्हा बेयरस्टो 112 बॉलमध्ये 91 रनवर खेळत होता. लंचनंतर लगेचच त्याने टेस्ट करियरमधलं 11वं शतक पूर्ण केलं. या खेळीमध्ये त्याने 14 फोर आणि 2 सिक्स मारले. यावर्षातलं त्याचं हे पाचवं शतक आहे. आधी ऍशेसमध्ये ऑस्ट्रेलियाविरुद्ध सिडनीमध्ये बेयरस्टोने शतक केलं. यानंतर वेस्ट इंडिजविरुद्ध 1 आणि न्यूझीलंडविरुद्ध 2 शतकी खेळी केल्या. बेयरस्टो यावर्षी टेस्ट क्रिकेटमध्ये सर्वाधिक रन करणारा खेळाडू आहे. आतापर्यंत 8 टेस्ट मॅचमध्ये त्याने 850 पेक्षा जास्त रन केले.

It's tense out there between Virat Kohli and Jonny Bairstow #ENGvIND pic.twitter.com/3lIZjERvDW

— Sky Sports Cricket (@SkyCricket) July 3, 2022

काय म्हणाला कोहली? मोहम्मद शमीचा बॉल बेयरस्टोला खेळता आला नाही, यानंतर कोहली बेयरस्टोला काहीतरी बोलला. यावर बेयरस्टोने विराटला प्रत्युत्तर दिलं. तेव्हा विराट बेयरस्टोच्या जवळ गेला आणि दोघांमध्ये वादाला सुरूवात झाली. या दोघांमधलं संभाषण स्टम्प माईकमध्ये कैद झालं. मला सांगू नको, काय करायचं ते. तोंड बंद ठेव आणि बॅटिंग कर, असं विराट बेयरस्टोला म्हणाला. विराट कोहली आणि जॉनी बेयरस्टो यांच्यातला वाद थांबवण्यासाठी अंपायरना मध्ये यावं लागलं. दोन्ही अंपायरनी विराट आणि बेयरस्टोला शांत व्हायला सांगितलं. मोहम्मद शमीची ओव्हर संपली तेव्हा विराट आणि बेयरस्टो यांच्यात पुन्हा चर्चा झाली, यावेळी दोघं हसताना दिसले.