IND vs ENG : बुमराहशी नडली इंग्लंडची पूर्ण टीम, विराटने ड्रेसिंग रूममधून दिली शिवी, VIDEO

लंडन, 16 ऑगस्ट : भारत आणि इंग्लंड (India vs England) यांच्यात लॉर्ड्सवर सुरू असलेल्या टेस्ट मॅचने रोमांच वाढवला आहे. खेळाच्या पाचव्या दिवशी इंग्लंडच्या खेळाडूंनी जसप्रीत बुमराहवर (Jasprit Bumrah) निशाणा साधला. बुमराहविषयी इंग्लंडच्या खेळाडूंनी अपशब्द वापरल्यानंतर भारतीय खेळाडूही भडकले, यानंतर बुमराह आणि बटलरमध्ये (Jos Butller) बाचाबाची झाली. अखेर अंपायरना मध्ये पडावं लागलं. बुमराह इंग्लंडच्या खेळाडूंशी पंगा घेत असल्याचं पाहून ड्रेसिंग रूममध्ये असलेला कर्णधार विराट कोहलीही (Virat Kohli) आक्रमक झाला. लॉर्ड्सच्या ड्रेसिंग रूममधून विराट कोहलीने शिव्या दिल्या आणि जोरजोरात टाळ्याही वाजवल्या. विराट कोहलीचा हा व्हिडिओ सध्या सोशल मीडियावर व्हायरल होत आहे.

Heat is on, Bumrah . #ENGvIND pic.twitter.com/ImuEAHiHAG

— Jon | Michael | Tyrion (@tyrion_jon) August 16, 2021

भारतीय इनिंगच्या 92 व्या ओव्हरनंतर लगेच ही घटना घडली. मार्क वूड (Mark Wood) जसप्रीत बुमराहला काही तरी म्हणाला, यानंतर बुमराहनेही त्याला उत्तर दिलं. या वादामध्ये इंग्लंडचा कर्णधार जो रूट (Joe Root) पडला, बुमराहने रूटलाही ऐकवलं. मैदानातल्या अंपायरनी इंग्लंडच्या खेळाडूंना समजावलं, पण खेळाडूंनी सीमा ओलांडल्याचं बुमराह अंपायरला सांगताना दिसला.

मैदानात सुरू असलेला वाद विराट कोहली बघत होता. लॉर्ड्सच्या ऐतिहासिक बाल्कनीमधून विराट कोहली हे सगळं बघत होता. या वादानंतर बुमराहने वूडला फोर मारली, त्यावेळी संतापलेल्या विराट कोहलीने टाळ्या वाजवल्या आणि शिव्याही दिल्या. विराटचा हा व्हिडिओ सोशल मीडियावर व्हायरल झाला.

कसा सुरू झाला वाद?

तिसऱ्या दिवशी बुमराह आणि जेम्स अंडरसन (James Anderson) यांच्यामध्ये झालेल्या बाचाबाचीनंतर या वादाला सुरुवात झाली. बुमराहने अंडरसनवर बाऊन्सरचा पाऊस पाडला. यातले काही बॉल अंडरसनच्या शरिरावरही लागले. अखेर मोहम्मद शमीने अंडरसनला बोल्ड केलं. आऊट झाल्यानंतर निराश झालेला अंडरसन भारतीय खेळाडूंना काहीतरी बोलला. यानंतर चौथ्या दिवशीही विराट आणि अंडरसन यांच्यात वाद झाले आणि पाचव्या दिवशीही हा पंगा सुरूच राहिला.

मोहम्मद शमी (Mohammad Shami) आणि जसप्रीत बुमराह यांच्या धमाकेदार बॅटिंगमुळे भारताने लॉर्ड्सवर सुरू असलेल्या दुसऱ्या टेस्टमध्ये (India vs England 2nd Test) मोठी आघाडी घेतली. शमी आणि बुमराहच्या या बॅटिंगमुळे इंग्लंडच्या हाता तोंडाशी आलेला विजयाचा घास जवळपास हिरावून घेतला. पाचव्या दिवसाचा लंच झाला तेव्हा भारताचा स्कोअर 286/8 एवढा झाला, त्यामुळे टीमची आघाडी 259 रनवर पोहोचली. मोहम्मद शमी 52 रनवर तर जसप्रीत बुमराह 30 रनवर नाबाद खेळत होते.