IPL2022: अहमदाबादची टीम होणार मुंबई इंडियन्स! 3 मुंबईकरांवर फ्रँचायझीची नजर

नवी दिल्ली, 26 नोव्हेंबर: आयपीएलच्या(IPL2022) आगामी हंगामामध्ये मोठे बदल पाहायला मिळणार आहेत. आता पुढील वर्षासाठी मेगा ऑक्शन (ipl mega auction 2022) होणार असून अनेक स्टार खेळाडू वेगळ्या संघांकडून खेळताना पाहायला मिळणार आहेत. अशातच 3 मुंबईकरांवर नव्या फ्रँचायझीची नजर असल्याचे पाहायला मिळत आहे. पांड्या ब्रदर्स म्हणजेच हार्दिक पांड्या (Hardik Pandya) आणि कृणाल पांड्या(Krunal Pandya) इंडियन प्रीमियर लीग (IPL) च्या पुढील हंगामात मुंबई इंडियन्सऐवजी इतर कोणत्याही फ्रेंचायझीसाठी खेळताना दिसणार आहेत. तसेच, या दोघांसोबत सूर्यकुमार यादवचेही(surya kumar yadav) नाव जोडण्यात येत आहे.

आयपीएल (IPL-2021) च्या शेवटच्या हंगामात अपयशी ठरलेले दोन्ही खेळाडू अनफिट आहेत. एवढेच नाही तर मुंबई फ्रँचायझी हार्दिक आणि कृणालला कायम ठेवणार नसल्याची चर्चा क्रिकेट जगतात रंगली आहे. हार्दिक अजूनही पूर्णपणे तंदुरुस्त नाही आणि नियमितपणे गोलंदाजी करत नाही. कृणालही काही काळापासून चांगली कामगिरी करू शकलेला नाही.

क्रिकबझच्या वृत्तानुसार, हार्दिक पांड्या आणि त्याचा मोठा भाऊ क्रुणाल पांड्या अहमदाबाद या नवीन आयपीएल फ्रँचायझीसाठी खेळू शकतात. त्याचे गुजराती कनेक्शन आणि राज्यातील त्याचे प्रचंड चाहते लक्षात घेता, व्यवस्थापन त्याला 2022 मध्ये नवीन हंगामासाठी आणण्यास उत्सुक आहे.

तसेच, पांड्या ब्रदर्ससोबत सूर्यकुमार यादवचेही नाव जोडण्यात येत आहे. सूर्यकुमार यादव हा अशा खेळाडूंपैकी एक आहे, ज्याला मुंबई इंडियन्सकडून कायम ठेवले जाणार नाही. अहवालात असेही म्हटले आहे की दोन नवीन फ्रेंचायझींपैकी एकाने (अहमदाबाद आणि लखनऊ) मेगा ऑक्शनपूर्वी सूर्यकुमारशी संपर्क साधला आहे. सूर्यकुमार हा निर्विवादपणे मुंबई इंडियन्सचा सर्वात महत्त्वाचा खेळाडू आहे. 2018 मध्ये कोलकाता नाईट रायडर्सकडून फ्रेंचायझीमध्ये सामील झाल्यानंतर, सूर्यकुमार लीगमध्ये रोहित शर्माच्या नेतृत्वाखालील संघासाठी खूप चांगला खेळाडू ठरला आहे.

क्रुणाल आणि हार्दिक यांनी मुंबई इंडियन्ससाठी चमकदार कामगिरी केली आहे. मात्र, या दोघांनाही गेल्या मोसमात विशेष काही करता आले नाही. हार्दिकने गेल्या मोसमात 12 सामने खेळले आणि एकूण 127 धावा केल्या. त्याच्या बॅटने एकही अर्धशतक झळकावले नाही. गेल्या दोन हंगामात तो आयपीएलमध्ये गोलंदाजीही करत नाहीये.

हार्दिकच्या आयपीएल कारकिर्दीबद्दल बोलायचे झाले तर त्याने 92 सामन्यात 4 अर्धशतकांच्या मदतीने 1476 धावा केल्या आहेत आणि 42 विकेट्स देखील घेतल्या आहेत.

30 वर्षीय कृणाल पांड्याही गेल्या मोसमात फ्लॉप ठरला. त्याने 13 सामने खेळले आणि एकूण 143 धावा केल्या. गेल्या 4 मोसमात त्याला फारशी कामगिरी करता आली नसली तरी. त्याच्या आयपीएल कारकिर्दीत त्याने 84 सामन्यात 1143 धावा केल्या आहेत आणि 51 विकेट घेतल्या आहेत.

सूर्यकुमार चार हंगामांपासून मुंबई इंडियन्सचा भाग आहे. सूर्यकुमारने प्रत्येक मोसमात 300 हून अधिक धावा केल्या आहेत. त्याने त्या चार मोसमात मुंबई इंडियन्ससाठी 30 पेक्षा जास्त सरासरी आणि 135 च्या स्ट्राइक रेटने 1733धावा केल्या आहेत. मुंबईकडून खेळताना त्याच्या नावावर टी-20 लीगमध्ये 10 अर्धशतकेही आहेत.