अफगाणिस्तानच्या असगर अफगाणने इतिहास घडवला, धोनीच्या विक्रमाशी बरोबरी

मुंबई, 19 मार्च : अफगाणिस्तानचा कर्णधार असगर अफगाणने (Asghar Afghan) टी-20 क्रिकेटमध्ये (T20 Cricket) इतिहास घडवला आहे. असगर अफगाण टी-20 क्रिकेटमध्ये सर्वाधिक विजय मिळवणारा कर्णधार बनला आहे. अफगाणने याबाबतीत टीम इंडियाचा माजी कर्णधार एमएस धोनीच्या (MS Dhoni) विक्रमाशी बरोबरी केली आहे. अफगाणिस्तानने शुक्रवारी झिम्बाब्वेचा (Afghanistan vs Zimbabwe) 45 रनने पराभव केला. याचसोबत अफगाणिस्तानने 3 मॅचच्या या सीरिजमध्ये 2-0 ने आघाडी घेतली आहे. त्याआधी दोन्ही टीममध्ये झालेली टेस्ट सीरिज 1-1 ने बरोबरीत सुटली होती.

दुसऱ्या टी-20 मध्ये अफगाणिस्तानने पहिले बॅटिंग करत 5 विकेट गमावून 193 रन केले. करीम जन्नतने 53 रनची खेळी केली, याशिवाय उस्मान गनीने 49 आणि मोहम्मद नबीने 15 बॉलमध्ये 40 रन केले, त्याच्या या खेळीमध्ये 2 फोर आणि 4 सिक्स मारले. असगर अफगाण 14 रनवर नाबाद राहिला. या आव्हानाचा पाठलाग करताना झिम्बाब्वेची टीम 17.1 ओव्हरमध्ये 148 रनवर ऑल आऊट झाली. रियान बर्लने सर्वाधिक 40 रन केले. अफगाणिस्तानकडून राशिद खानने सर्वाधिक 3 विकेट घेतल्या. नवीन उल हक आणि मोहम्मद नबीला प्रत्येकी 2-2 विकेट मिळाल्या. ऑलराऊंड कामगिरी करणाऱ्या नबीला मॅन ऑफ द मॅच देऊन गौरवण्यात आलं.

असगरची कामगिरी धोनीपेक्षा चांगली

असगर अफगाण आणि एमएस धोनी यांनी कर्णधार म्हणून 41-41 टी-20 आंतरराष्ट्रीय मॅच जिंकल्या आहेत. असगरने 51 मॅचमध्ये तर धोनीने 72 मॅचमध्ये हा रेकॉर्ड केला. इंग्लंडचा कर्णधार इयन मॉर्गन 33 विजयांसोबत तिसऱ्या क्रमांकावर आहे. पाकिस्तानचा माजी कर्णधार सरफराज अहमदने 20 विजय, वेस्ट इंडिजचा माजी कर्णधार डॅरेन सॅमीने 27 मॅच जिंकल्या.

असगर अफगाणने कर्णधार असताना सर्वाधिक 12 सामने आयर्लंडविरुद्ध जिंकले. याशिवाय झिम्बाब्वेविरुद्ध 9, युएई-ओमानविरुद्ध 5-5 विजय मिळवले. अफगाणिस्तानला मोठ्या टीमविरुद्ध खेळण्याची संधी क्वचितच मिळते. असगर अफगाणिस्तानचा कर्णधार असताना त्याला इंग्लंड, दक्षिण आफ्रिका आणि श्रीलंकेविरुद्ध विजय मिळवता आला नाही.