पुणेकरांसाठी 2 मोठ्या बातम्या; सर्व बंधनं उठणार, कपात टळणार

पुणे, 4 ऑगस्ट :  पुणेकरांसाठी दोन महत्त्वाचे निर्णय आज महापालिकेने घेतले आहेत. Coronavirus मुळे लागू असलेला लॉकडाऊन प्रतिबंधित क्षेत्रात सुरू असला तरी अन्य सर्व शहर खुलं केलं जाणार आहे. दुकानांसाठी असलेला सम-विषम तारखेचं बंधन आता नसेल. शिवाय  दुसरी महत्त्वाची बातमी म्हणजे पुणेकरांवर असलेली पाणीकपातीची टांगती तलवारसुद्धा सध्यापुरती हटवण्यात आली आहे.

पुणे महापालिकेने दोन महत्त्वाचे निर्णय घेत आगामी गणेशोत्सवाच्या दृष्टीने नागरिकांना दिलासा दिला आहे. पुण्याच्या धरणक्षेत्रात पुरेसा पाऊस झाला नसल्याने पाणीकपात होण्याची शक्यता होती. पण तूर्तास किमान गणेशोत्सवापर्यंत पाणीकपात न करण्याचा निर्णय घेण्यात आला आहे.

दुकानदारांच्या मागणीला यश

पुण्यातली दुकानं एक दिवसाआड सम आणि विषम तारखांप्रमाणे उघडण्यास परवानगी देण्यात आली होती. मात्र आता लवकरच हे बंधनही उठवण्यात येणार आहे. पुणे महापालिकेचे आयुक्त यासंंबंधी आदेश लवकरच काढतील. शहरातली सर्व दुकानं सकाळी 9 ते 7 या वेळेत सुरू राहणार आहे.

आयुक्त विक्रमकुमार यांनी व्यापाऱ्यांच्या मागणीला दाद देत हा निर्णय घेतला आहे. पुण्यात COVID ची साथ अद्याप आटोक्यात आलेली नाही. पण लॉकडाऊनचे नियम मात्र शिथिल करण्यात आले आहेत. मुंबईत नुकतीच दुकानं उघडण्याला परवानगी देण्यात आली. आता मुंबईनंतर पुण्यातही दुकाने उघडण्यासाठी सम-विषमचे असलेले बंधन उठविण्यात येणार आहे.