कारऐवजी माहेरवाशीण आली बैलगाडीतून, दिला पर्यावरण रक्षणाचा संदेश, पाहा PHOTOs

मध्यप्रदेशच्या नेपानगरमध्ये राहणाऱ्या भगवत चव्हाण यांनी लेकीला सासरहून माहेरी आणताना पर्यावरण रक्षणाचा अनोखा संदेश दिला आहे. आपल्या मुलीला माहेरी आणण्यासाठी ते बैलगाडीतून पोहोचले. बैलगाडी उत्तमरित्या सजवण्यात आली होती.

भागवत चव्हाण यांची कन्या पूजा चव्हाणचं दोनच दिवसांपूर्वी शुभम पाटणकर यांच्याशी लग्न झालं होतं. चव्हाण परिवारानं लेकीला घरी आणण्यासाठी सजवलेली बैलगाडी पाठवली आणि त्यात बसवून पूजा माहेरी आणलं.

बैलगाडीचा वापर सध्या केवळ शेतीच्या कामासाठी आणि शेतात जाण्यासाठीच होताना दिसतो. कधीकधी पेट्रोल आणि डिझेलच्या दरवाढीविरोधात आंदोलन करताना विरोधी पक्ष त्याचा वापर करतात. मात्र लग्नाचा आणि बैलगाडीचा संबंध आताशा येताना दिसत नाही.

पूजाच्या सासरच्या मंडळीना ही अनोखी कल्पना पाहून आनंद झाला. त्यांनी चव्हाणांचं जोरदार स्वागत केलं आणि सुनेला त्यांच्यासोबत माहेरी पाठवलं. सर्वांनी बैलगाडीसोबत एकत्र फोटोदेखील काढला.

चव्हाणांप्रमाणेच जर सर्वांनी बैलगाडीचा उपयोग केला, तर पर्यावरण रक्षणासाठी त्याचा मोठा उपयोग होईल आणि पेट्रोल डिझेलवर होणाऱ्या खर्चातही बचत होईल, असं मत व्यक्त करण्यात येत आहे.

भागवत चव्हाण आनंदानं आपल्या लेकीला घेऊन घरी रवाना झाले. सर्वांनी आनंदानं त्यांना निरोप दिला.