टर्कीत सहा दिवसांपासून पेटलाय वणवा, हजारो नागरिकांचं स्थलांतर, पाहा भीषण आगीचे Photos

विमानं आणि हेलिकॉप्टरच्या मदतीनं हा वणवा विझवण्याचं काम सुरू आहे. स्थानिकही आपापल्या परीनं पाणी आणि माती टाकून ही आग विझवण्याचा प्रयत्न करत आहेत. गेल्या सहा दिवसांपासून हा वणवा पेटला आहे. त्यावर नियंत्रण मिळवण्यात अपयश येत असल्यामुळे टर्की सरकारवर जोरदार टीका होत आहे.

अंटालिया शहराच्या परिसरात रहिवासी भागालाही या वणव्याची झळ बसली आहे. रहिवासी परिसरातील काही भागांना आगी लागत आहेत.

सात ठिकाणी अजूनही आग भडकते आहे. सध्या टर्कीतील तापमान 40 अंशांपेक्षा अधिक असल्यामुळे आगी भडकत असल्याचं सांगण्यात आलं आहे. त्याचबरोबर वेगाने वाहणाऱ्या वाऱ्यांमुळे आग पसरत चालली आहे.

हिरव्यागार झाडांनाही काही ठिकाणी आगी लागत असल्याचं चित्र आहे. वाढत्या तापमानाचा हा परिणाम असल्याचं सांगितलं जात आहे.

दरम्यान, 16 विमानं आणि 47 हेलिकॉप्टर्सच्या मदतीनं ही आग विझवण्याचे प्रयत्न सुरू आहेत.

आगीमुळे बेचिराख झालेला मर्मरिस जिल्ह्यातील हा एरियल फोटो आगीची भीषणता दाखवणारा आहे.

टर्कीतील वातावरणात कमालीचा शुष्कपणा आहे. ही दुर्मिळ घटना असून एकाचवेळी उष्णता, शुष्कपणा आणि वारे यांचा हा परिणाम असल्याचं पर्यावरण तज्ज्ञ सांगत आहेत.

युरोपियन युनियनकडून आग विझवण्यासाठी दोन विमानं पाठवण्यात आली आहेत.

जंगलाला लागलेल्या या वणव्यात आतापर्यंत 8 लोकांचा मृत्यू झाला आहे.

हजारो नागरिकांना इतरत्र स्थलांतरीत करण्यात आलं आहे. तर अनेक पर्यटकांनादेखील सुरक्षित ठिकाणी हलवण्यात आलं आहे.