‘अमेरिकेत 5 महिन्यात येणार COVID-19वर लस’, तज्ज्ञांच्या दाव्याने आशा वाढली

जगात सर्वात शक्तिशाली समजल्या जाणाऱ्या अमेरिकेत कोरोनाचा सर्वात जास्त उद्रेक आहे. कोरोना रुग्णांच्या संख्येत आणि रुग्णांच्या मृत्यूच्या संख्येतही अमेरिका पहिल्या क्रमांकावर आहे.

कोरोनावर लस शोधण्यात अमेरिकेतले तज्ज्ञ आघाडीवर आहेत. ऑक्सफर्डच्या लशीचे निकाल आशा वाढवणारे असल्याने तज्ज्ञांचा हुरुप वाढला आहे.

या वर्षाच्या शेवटी किंवा 2021च्या सुरुवातीला कोरोनावर लस येईल असा दावा साथ रोग विषयातले अमेरिकेचे क्रमांक एकचे डॉक्टर अँथोनो फाउसी यांनी केलाय.

डॉ. फाउसी यांनी अमेरिकेन काँग्रेसच्या सदस्यांपुढे बोलतांना हा दावा केल्याने त्याला महत्त्व प्राप्त झालं आहे.

हा फक्त आशावाद नसून वस्तुस्थिती आणि होत असलेलं काम पाहून मी हा दावा करत असल्याचं त्यांनी सांगितलं.

अमेरिकेत ऑक्सफर्ड विद्यापीठाने तयार केलेल्या कोरोना लशीची मानवी चाचणी सुरु असून त्याचे निकालही सकारात्मक आले आहेत.

अशा प्रकारची लस आली तर त्याचे 35 कोटी डोज बनविण्याची योजना अमेरिकेने आखली असून त्याची तयारीही सुरु केली आहे.

औषध यायला वेळ असल्याने तोपर्यंत आणि नंतरही नागरिकांनी मास्क वापरणे, सोशल डिस्टन्सिंगचं पालन करणे आणि वारंवार हात धुणे याची काळजी घेतली तर फायदा होणार असल्याचंही त्यांनी सांगितलं.