COVID-19: सर्व जगाला प्रतिक्षा, मात्र हे लोक म्हणतात लसच नको; WHOही हादरलं

जगभर धुमाकूळ घालणाऱ्या कोरोनावर औषध शोधण्यासाठी जगातले अनेक देश प्रयत्न करत आहेत. मात्र अनेक प्रगत देशांमध्ये कोरोना लशीच्या विरोधात आंदोलन उभं राहिलं असून WHOला त्याची दखल घ्यावी लागली आहे.

जगभरात कोरोनाने आत्तापर्यंत 8 लाखांच्या जवळपास म्हणजे तब्बल 7,88,503 बळी घेतले आहेत. त्यामुळे तातडीने त्यावर औषध शोधण्यासाठी जगभरातून प्रयत्न होत आहेत.

मात्र औषध शोधण्यात आलं तरीही आम्ही ते औषध घेणार नाही अशी चळवळ आता उभी राहिली असून अनेक प्रगत देशांमध्ये त्याचा प्रसार होत आहे.

अमेरिका, ब्रिटन, कॅनडा, ऑस्ट्रेलियासह काही देशांमध्ये अशा प्रकारच्या चलवळींनी जोर धरला असून त्याची दखल जागतिक आरोग्य संघटनेला घ्यावी लागली आहे.

आम्ही लस घेणार नाही असं म्हणणं हा विचार हा जगातल्या सर्वात मोठ्या 10 धोक्यांमध्ये असल्याचं खुद्द WHOने म्हटलं आहे.

अशा प्रकारच्या लशींची गरज नसून त्यामुळे अनेक आजार उद्भवतात असं या लोकांचं म्हणणं आहे. आपलं शरीरच कुठल्याही आजारावर मात करण्यासाठी सक्षम असल्याचा दावा त्यांनी केलाय.

अशी लस आली तरीही ती आम्ही घेणार नाही आणि आमच्या मुलांनाही देणार नाही असा दावाही त्यांनी केलाय.

या चळवळींचा धोका ओळखून अमेरिकेतल्या काही राज्यांनी आणि ऑस्ट्रेलियानेही कायदा करत ही लस घेणं सक्तींचं असणार असल्याचा नियमच केला आहे.

ही लस घेतली नाही तर मुलांच्या शिक्षणासाठी आणि आरोग्य विषयक सवलती मिळणार नसल्याचंही काही देशांनी सांगितलं आहे.