अॅपलचे CEO म्हणतात, 'मी गे आहे आणि ती मला देवानं दिलेली मोठी भेट आहे'

मी गे आहे आणि त्याचा मला अभिमान आहे. देवानं मला दिलेली ही सगळ्यात मोठी भेट मी समजतो, असं अॅपलचे मुख्य कार्यकारी (CEO)अधिकारी टिम कुक यांनी म्हटलंय. अॅपलसारख्या बड्या कंपनीचं प्रमुखपद सांभाळणारे टिम कुक हे जागतिक कंपनीत एवढं मोठं पद सांभाळणारी पहिली गे व्यक्ती ठरलेली आहे.

टिम कुक यांच्या लैंगिकतेविषयी पूर्वीपासूनच चर्चा होती, पण याबाबत स्वतः कुक यांनी कधी जाहीरपणे वाच्यता केलेली नव्हती. CNNच्या एका मुलाखतीच्या कार्यक्रमात त्यांनी आपण समलिंगी असल्याचं सांगितलं. मी गे आहे आणि ती देवानं मला दिलेली मोठी भेट आहे", असं ते म्हणाले.

आपली लैंगिकता अशी जाहीरपणे उघड करण्याचं ठरवलं कारण काही मुलांनी मला पत्रं लिहून त्यांना मिळणाऱ्या हीन वागणुकीविषयी कळवलं. आपल्याला कसे टोमणे मारले जातात आणि वाईट वागणूक दिली जाते, काहींना तर घराबाहेर काढलं जातं हे या मुलांनी कळवलं. त्यातल्या काहींनी तर आत्महत्येचा टोकाचा विचारही केल्याचं कळलं आणि मी समलिंगी असल्याचं जाहीरपणे सांगण्याचं ठरवलं.

टिम कुक म्हणतात, "लैंगिकता ही खासगी गोष्ट आहे आणि खासगीपणाच्या हक्काचा मी पुरस्कर्ता आहे. म्हणून मीसुद्धा समलिंगी असल्याचं आतापर्यंत जाहीरपणे सांगितलेलं नव्हतं. पण या मुलांची परिस्थिती मला कळली आणि मी गे असल्याचं आणि त्यात काही गैर नसल्याचं सांगितल्यानं त्यांना मदत होईल, असं वाटलं. म्हणून मी हे जाहीरपणे सांगतोय."

गे असलात तरी तुम्हाला चांगली संधी मिळू शकते. तुमची लैंगिकता तुमच्या प्रगतीच्या आड येत नाही, हेच आपल्याला सांगायचंय असं टिम कुक म्हणाले. अॅपलचे संस्थापक आणि प्रमुख स्टीव्ह जॉब्ज यांचं निधन झाल्यानंतर ऑक्टोबर २०१६मध्ये टिम कुक यांनी जॉब्ज यांची जागा घेतली.

CNNला दिलेल्या या मुलाखतीत टिम कुक यांनी ट्रंप प्रशासनाच्या इमिग्रेशन धोरणावरही टीका केली आहे. अमेरिकेनं व्हिसा नियम कडक केल्यामुळे अमेरिकेत स्थलांतरित होणाऱ्या परदेशी व्यक्तींची संख्या मर्यादेत राहणार आहे. पण स्थलांतराचा फायदा अमेरिकेलाही होतो. देशाच्या उत्पन्नाला हातभार लागतो, असं कुक यांना वाटतं. इमिग्रेशनमुळे GDP वाढतो, असं टिम कुक म्हणाले.